Telugu Blog of Shirdi Sai Baba,read sai leels,devotees experiences in telugu

సాయి.బా.ని.స. డైరీ - 1994 (33)

2012-02-22T08:06:00.009-08:00

22.02.2012 బుధవారము

ఓం సాయి శ్రీసాయి జయజయ సాయి
సాయిబంధువులకు బాబావారి శుభాశీస్సులు

ఈరోజు సాయి.బా.ని.స. డైరీ - 1994 33వ.భాగాన్ని చదువుకుందాము

సాయి.బా.ని.స. డైరీ - 1994 (33)

09.11.1994

నిన్నటిరోజున ఆధ్యాత్మికపరమైన ఆలోచనలతో గడిపినాను. భగవంతుని అనుగ్రహము పొందవలెనంటే శాస్త్రాలు చదవాలా ! శాస్త్రపరమైన విధానాల్తో మాత్రమే భగవంతుని పూజించాలా! అనే విషయమై సలహా యివ్వమని శ్రీ సాయిని వేడుకొన్నాను. రాత్రి కలలో శ్రీ సాయి చూపిన దృశ్యము నాకు కనువిప్పు కలిగించినది. "నా కుమారుడు (మూడు సంవత్సరాల వయస్సు) నా యింటిముందు పార్కులో ఉయ్యాల ఊగుతున్నాడు.

నేను ఆనందముతో చూస్తున్నాను. తోటి పిల్లలు గట్టిగా ఊపుతున్నారు. ఆసమయములో నా కుమారుని చేతిపట్టు తప్పిపోయినది. పైనుంచి క్రిదకు పడిపోతున్నాడు. నేను ఏమి చేయలేని స్థితిలో "సాయి" అని గట్టిగా అరచి నిలబడి చూస్తున్నాను. నాకళ్ళను నేను నమ్మలేకపోయినాను. నాకుమారుడు గాలిలో తేలుతు నా యింటి గుమ్మముదగ్గరకు వచ్చి నేలమీదకు దిగినాడు. శ్రీ సాయినాధుడే నా పిల్లవానిని కాపాడి నాయింటి గుమ్మము దగ్గరకు చేర్చినారని నమ్మినాను. ఆ సమయములో నాభార్య నాకు అన్నము వడ్డించి టేబుల్ మీద పెట్టినది. శ్రీ సాయి నాకుమారుని ప్రమాదమునుండి కాపాడినారు అని నాభార్యకు చెప్పి, నాకోసము వడ్డించిన అన్నమును కృతజ్ఞతా భావముతో నాయింటి పూజామందిరములో ఉన్న శ్రీ సాయినాధుని విగ్రహమునకు అన్నముతో అభిషేకము చేసినాను. ఆ సమయములో నాయింటికి వచ్చిన ఒక స్నేహితుడు శాస్త్రప్రకారము అన్నముతో భగవంతునికి అభిషేకము చేయరాదు అన్నారు. నేను, "నాకు శాస్త్రాలలోని విషయాలు తెలియవు" నాకు భగవంతునిపై నమ్మకము మాత్రము ఉంది. ఆయన నాకుమారుని ప్రమాదమునుండి రక్షించినారు. ఆయనకు కృతజ్ఞతతో నేను తినవలసిన అన్నముతో అభిషేకము చేసినాను" అన్నాను. నిద్రనుండి మెలుకువ వచ్చినది.

10.11.1994

నిన్నటిరోజున జీవితములో సుఖ సంతోషాలు గురించి ఆలోచించినాను. రాత్రి నిద్రకు ముందు శ్రీ సాయికి నమస్కరించి జీవితములో సుఖ సంతోషాలను ఉదాహరణలుగా చూపించమని వేడుకొన్నాను. శ్రీ సాయి చూపిన దృశ్యాలు.

1) రోడ్డుకు అడ్డముగా ఉన్న రాళ్ళు రప్పలను తొలగించి రోడ్డుమీద ప్రయాణీకులు సంతోషముగా ప్రయాణము చేస్తున్నపుడు నీమనసులో కలిగే భావాలు.

2) అనుకోని సంఘటనలలో చాలా సంవత్సరాల తర్వాత నీవు నీకుటుంబ సభ్యులను కలసినపుడు నీమనసులోని భావాలు.

3) నీవు మోటార్ సైకిల్ మీద ప్రయాణము చేస్తున్నపుడు రోడ్డుమీద ఎండలో నడవలేకుండ యున్న వ్యక్తికి నీ మోటార్ సైకిల్ మీద అతనిదగ్గరనుండి ఏమీ ఆశించకుండ అతనిని అతని గమ్యస్థానము చేర్చినపుడు నీమనసులోని భావాలు.

4) నీ చిన్న తనములో నీవు చదివిన బడి శిధిలావస్థలో ఉన్న అక్కడ కొద్ది క్షణాలు కూర్చుని చిన్ననాటి జ్ఞాపకాలతో సంతోషపడటము.

5) ముళ్ళ చెట్టుకు తియ్యటి పండ్లు బాగా కాసిన ఆచెట్టుపైకి ఎక్కి ఆపండ్లు కోసుకొని తినలేని స్థితిలో గాలికి ఆ చెట్టు వంగినపుడు నీవు కష్టపడకుండానే ఆ పండ్లను కోసిన క్షణములో నీ మనసుకు కలిగే సంతోషము.

6) నీవు ఆకలితో ఉన్నపుడు ఎవరైన ప్రేమతో చద్ది అన్నము పెట్టినపుడు నీలోని భావాలు.

7) నీవు నీ కుమారుని సైకిలు ముందు భాగాన్న కూర్చోపెట్టుకొని వాని భవిష్యత్ గురించి ఆలోచించుతు సైకిలు త్రొక్కుతున్నపుడు నీలోని భావనలు - సుఖ సంతోషాలకు ఉదాహరణలు.

నిద్రనుండి తెలివి వచ్చినది. ఒక్కసారి ఆలోచించినాను. ఈ సుఖసంతోషాలు అనేవి నీమానసిక స్థితి. అవి వేరేగా బయట దొరకవు. వాటిని నీవు నీలోనే వెదకి అనుభవించాలి అనే నిజాన్ని గ్రహించినాను.

12.11.1994

నిన్నటిరోజున జీవితములో కలిగే నిరాశ, నిరాశనుండి బయటపడే మార్గము గురించి ఆలోచించసాగినాను. రాత్రి నిద్రకు ముందు శ్రీ సాయికి నమస్కరించి వీటిపై వివరణ యివ్వమని కోరినాను. శ్రీ సాయి ప్రసాదించిన దృశ్యాల వివరాలు. జీవితములో కొందరు వ్యక్తులు నీకు జరగవలసిన న్యాయాన్ని జరగనీయకుండ అడ్డుకొన్నపుడు నీలో నిరాశ ఆవహించుతుంది. నేను శారీరకముగా అవ్యక్తులను ఎదుర్కోలేని స్థితిలో ఉన్నపుడు నిస్పృహ ఆవహించుతుంది. అటువంటి సమయములో తెలివితేటలు (జ్ఞానాన్ని) ఉపయోగించి నీవు నీకు జరగవలసిన న్యాయాన్ని పొందటమె నిరాశ - నిస్పృహలనుండి బయటపడే మార్గము.

(యింకా ఉంది)
సర్వం శ్రీ సాయినాధార్పణమస్తు

సాయి.బా.ని.స. డైరీ - 1994 (32)

2012-02-21T07:29:00.007-08:00

21.02.2012 మంగళవారము

ఓం సాయి శ్రీ సాయి జయజయ సాయి
సాయిబంధువులకు బాబావారి శుభాశీస్సులు

ఈ రోజు సాయి.బా.ని.స. డైరీ - 1994 32 వ.భాగాన్ని చదువుకుందాము.

సాయి.బా.ని.స. డైరీ - 1994 (32)

01.11.1994

నిన్నటిరోజున మనసు అదుపులో పెట్టటము ఎలాగ అని ఆలోచించినాను. సమధానము తెలియచేయమని శ్రీ సాయిని వేడుకొన్నాను. శ్రీ సాయి దృశ్యరూపములో యిచ్చిన సమాధానము. "మనసు కోరికల పుట్ట. దానికి ఆకాశము సరిహద్దు. ఈ కోరికలను మనసు అనే రాకెట్టులో పెట్టి ఆకాశములోనికి తీసుకొని వెళ్ళగలము కాని అంతరిక్షములో కొంత వరకే ఎగిరి మనసు అనే రాకెట్టు భూమిమీదకు పడక తప్పదు.

ఈ నిజాన్ని అనుక్షణము గుర్తించిననాడు మనము మనసును అదుపులో పెట్టుకోగలము.

02.11.01994

నిన్నటిరోజున శ్రీ సాయికి నమస్కరించి "చెడు ఆలోచనలను అదుపులో పెట్టే మార్గము చూపించు తండ్రీ" అని వేడుకొన్నాను. శ్రీ సాయి అజ్ఞాత వ్యక్తి రూపములో దర్శనము యిచ్చి చూపించిన దృశ్యాల సారాంశము.

"నీ మనసు ద్వీపకల్పము వంటిది. మూడువైపుల (అంటే భూత-భవిష్యత్-వర్తమానకాలాలలో) నీరు ఉన్న, చెడు ఆలోచనలు ఒకవైపు ఉన్న, భూమార్గము అంటే వెనకటి జన్మ వాసనలు ద్వారా మనసులోనికి వస్తాయి. ఒక సారి చెడు ఆలోచనలు మనసులోనికి వస్తే వాటిని అదుపులో పెట్టటము కష్టము. అందుచేత ద్వీపకల్పములాంటి నీమనసుకు ఒకవేపు ఉన్న భూమార్గాన్ని (వెనుకటి జన్మ వాసనలును) తెగకొట్టి నీ మనసు నాలుగువైపుల నీరు ప్రవహించేలా చేసుకొని నీ మనసును సాయి సాగరములోని ద్వీపముగా మార్చుకో. ఒకసారి ద్వీపముగా మారిన మనసులో చెడు ఆలోచనలు చేరలేవు". ఈ విధమైన సందేశమునకు శ్రీ సాయికి కృతజ్ఞతలు తెలియచేసినాను.

04.11.1994

నిన్న రాత్రి శ్రీ సాయి భక్తులలోకెల్ల ఉత్తమ భక్తుడు ఎవరు తెలియచేయమని శ్రీ సాయిని వేడుకొన్నాను. శ్రీ సాయి దృశ్యరూపములో యిచ్చిన సందేశము వివరాలు.

"ఎవడు అయితే తను తినే ఆహారము నాపేరిట సాటి మానవునితో పంచుకొని తినునో, మరియు ఆ సాటిమానవుడు తనకంటే తక్కువవాడు కాదు అనే భావనతో తనప్రక్కనే కూర్చుండపెట్టుకొని తినునో అతడే నా భక్తులలోకెల్ల ఉత్తమ భక్తుడు."

05.11.1994

నిన్నటి రోజున విరక్తి వైరాగ్యాలు గురించి వివరించమని శ్రీ సాయిని వేడుకొన్నాను. రాత్రి కలలో శ్రీ సాయి చూపిన దృశ్యాల సారాంశము.

1) జీవితములో చీటికి మాటికి డబ్బులేదని, సౌకర్యాలు లేవని అసంతృప్తితో జీవించటము అంటే విరక్తి జీవితము అని అర్ధము.

2) జీవితములో శారీరకముగా సర్వ సుఖాలు అనుభవించుతూ మానసికముగా బాధపడుతూ జీవించటము అంటే వైరాగ్య జీవితము అని అర్ధము.

విరక్తి జీవితమునుండి బయట పడాలి అంటే "తృప్తి" తో జీవితము గడపాలి. వైరాగ్య జీవితమునుండి బయటపడాలి అంటే "ఆధ్యాత్మికత" తో జీవితము గడపాలి.

06.11.1994

నిన్నటి రోజున జీవన్ ముక్తి గురించి ఆలోచించుతూ శ్రీ సాయికి నమస్కరించి నిద్రపోయినాను. శ్రీ సాయి చూపిన దృశ్యాల వివరాలు సందేశము.

"కాలాన్ని వ్యర్ధము చేయకుండ మనిషిగా పుట్టిందులకు తన బాధ్యతలను సరిగా నిర్వర్తించుతు, ప్రశాంత జీవితము గడుపుతు అనుక్షణము భగవన్ నామస్మరణ చేస్తు భగవంతుని పాదాలపై ఆఖరి శ్వాస తీసుకోవటమే జీవన్ ముక్తి. - శ్రీ సాయి.

07.11.1994

నిన్న రాత్రి నిద్రకు ముందు "ముక్తిని కోరేవారికి తత్వ విచారణ అవసరమా లేదా తెలియచేయమని శ్రీ సాయిని వేడుకొన్నాను. శ్రీ సాయి అదృశ్యావ్యక్త రూపములో యిచ్చిన సమాధానము. "మనిషి జీవించినంత కాలము సన్మార్గములో పయనించుతు భగవన్ నామస్మరణ చేస్తు ఆఖరి శ్వాస తీసుకొంటే ఆవ్యక్తికి ముక్తి లభించుతుంది. అటువంటి వ్యక్తి జీవించినపుడు తత్వ విచారణ చేసి యుండనవసరము లేదు.

(యింకా ఉంది)
సర్వం శ్రీ సాయినాధార్పణమస్తు

సాయి.బా.ని.స. డైరీ - 1994 (31)

2012-02-20T07:14:00.000-08:00

20.02.2012 సోమవారము

ఓం సాయి శ్రీ సాయి జయజయ సాయి
సాయి బంధువులకు మహాశివరాత్రి శుభాకాంక్షలు

ఈరోజు సాయి.బా.ని.స. డైరీ - 1994 31వ. భాగాన్ని చదువుకుందాము

సాయి.బా.ని.స. డైరీ - 1994 (31)

29.10.1994

నిన్నటి రాత్రి నిద్రకు ముందు శ్రీ సాయికి నమస్కరించి ఆధ్యాత్మిక రంగములో చెప్పబడే "ఆత్మ" గురించి తెలియచేయమని కోరుకొన్నాను. శ్రీ సాయి చూపిన దృశ్యాల వివరాలు. ఆత్మకు రూపము లేదు. భగవంతునికి రూపము లేదు. అందుచేత ఆత్మ భగవత్ స్వరూపము. ఈ రూపము లేని భగవంతుని గురించి ఆలోచించటము, పూజించటము కష్టమైన పని. అందుచేత భగవంతునికి నీకు యిష్టమైన ఆకారము (నీ యిష్టదైవము) లో ఊహించుకొని పూజించటము ఉతమమైన పధ్ధతి. శ్రీ ఆంజనేయుడు తన గుండెలను చీల్చినపుడు అతని ఆత్మ అతని యిష్టదైవము అయిన శ్రీరామ చంద్రుని రూపములో కనిపించినది.

ఈ ఆత్మ శరీరాన్ని వదలినపుడు తన గురువు చేతిని పట్టుకొని పవిత్ర నదిపై (నీటిపై) నడవగలుగుతుంది. నీరు ఆ రూపానికి అంటుకోదు. ఆత్మ నీటిలో మునిగిపోదు.

ఆత్మ నీ గురువు సహాయముతో ఒక పెద్ద కొండ శిఖరము పైకి చేరుతుంది. అక్కడనుండి ఆత్మ తన గత జన్మలోని మనుషులను ప్రదేశాలను చూస్తుంది. ఆకొండ మీద నుండి ఆకాశము (విశ్వము) లోనికి నడవమని గురువు చెబుతారు. ఆపర్వతము పైనుండి ముందుకు ప్రయాణము చేయగలిగిన ఆత్మ పరమాత్మలో ఐక్యమగుతుంది. భయపడి వెనక్కి అడుగువేసినా తిరిగి పునర్జన్మ ఎత్తుతుంది. ఒక్కసారి నిద్రనుండి ములుకువ వచ్చినది. ఆలోచించినాను. జన్మ పునర్జన్మల్లో గురువు యొక్క ప్రాముఖ్యత ఆత్మ యొక్క స్వరూపము శ్రీ సాయి కళ్ళకు కట్టినట్లుగా చూపించినారు. శ్రీ సాయికి నమస్కరించినాను.

30.10.1994

నిన్న రాత్రి నిద్రకు ముందు శ్రీ సాయికి నమస్కరించి "మనసు" గురించి విషయాలు తెలియచేయమని కోరుకొన్నాను. శ్రీ సాయి చూపిన దృశ్యాల వివరాలు. "నేను నా జీవిత యాత్ర కాకినాడ రైల్వే స్టేషన్ నుండి ప్రారంభించినాను. సర్పవరము స్టేషన్ లో రైలు ఆగినది. ఆ స్టేషన్ లో ఒక స్త్రీతో వివాహము జరిగినది. రైలు సామర్లకోట స్టేషనుకు వచ్చినది. కొంతమంది స్నేహితులు అఱచేతిలో స్వర్గము చూపించి నాద్గ్గర ఉన్న డబ్బు గుంజుకొనుచున్నారు. సామర్లకోట స్టేషన్లో ధనముతో అన్ని కోరికలు తీర్చుకోవటానికి చాలా దుకాణాలు ఉన్నాయి. నేను నాభార్య కలసి యింకొక రైలు ఎక్కవలసి యున్నది. నా భార్య యిప్పుడు ఆ రైలు ఎక్కవద్దు, యింకా నేను చాలా వస్తువులు యిక్కడ కొనాలి అని వచ్చిన రైలును ఎక్కనీయలేదు. ఆ రైలు వెళ్ళిపోయినది. నేను నాభార్య సామర్లకోట స్టేషన్ ప్లాట్ ఫారం మీద సామానులు కొంటూ రోజులు గడిపి వేయసాగినాము. ఆ ప్లాట్ ఫారం మీదనే మానసిక కోరికలు, శారీరక కోరికలు తీర్చుకొని ప్లాట్ ఫారం మీద బంజారా జాతి ప్రజలలాగ జీవితము గడపసాగినాము. ఈవిధమైన జీవితములో మేము యిద్దరము మాకు యిద్దరు అనే ఆలోచనలతో మాకు యిద్దరు పిల్లలు కలిగినారు. ఆప్లాట్ ఫారం మీద మా జీవితాన్ని దూరంగా ఉన్న పొట్టి శ్రీరాములు విగ్రహము చూస్తూ నవ్వుచున్నది. ఆ విగ్రహము నన్ను చూస్తూ నవ్వుతుంటే నాలో కోపము కలిగినది. ఉలిక్కిపడి నిద్రనుండి లేచినాను. ఈవిధమైన కలద్వారా శ్రీ సాయి యిచ్చిన సందేశము ఏమిటి అని ఆలోచించినాను. నాకు తోచిన ఆలోచనలు 1) జీవితము ఒక రైలు ప్రయాణము వంటిది. 2) మనసు ఈ ప్రయాణములో మనకు మనతోటి ప్రయాణీకుల మధ్య వారధిగా ఉంటుంది. 3) తోటి ప్రయాణీకులతో కలసిమెలసి యుండటానికి మనసు మనలను కోరికల సుడిగుండములో పడవేస్తుంది. 4) ఈ కోరికల సుడిగుండమునుండి బయట పడటానికి సాయి (పొట్టి శ్రీరాములు) సహాయము కోరాలి.

31.10.1994

నిన్నటిరోజున జీవితములో "మనసు" ను తెలుసుకొనే మార్గము గురించి ఆలోచించుతు రాత్రి నిద్ర పోయినాను. శ్రీ సాయి కలలో చూపించిన దృశ్యాల సారాంశము.

"మనసు కోరికల పుట్ట. మనసును విచ్చల విడిగా వదలరాదు. మనసును క్రమశిక్షణలోనే యుంచాలి. అపుడు అది సరీయిన మార్గములో ప్రయాణించుతుంది. మనసు గురించ్ తెలుసుకోవాలి అంటే జీవితములో ఎల్లపుడు మంచి ఆలోచనలను ఆహ్వానించుతు ఉండాలి. అటువంటి ఆలోచనలనుండి ఉన్నతమైన ఆలోచనలను మనము ఎన్నుకొని వాటిని మనజీవిత లక్ష్యముగా ఏర్పరుచుకోవాలి. ఈవిధమైన జీవిత లక్ష్యాన్ని సాధించటము అంటే మన "మనసును" మనము తెలుసుకోవటము.

నీ జీవిత లక్ష్యాన్ని సాధించటానికి నీ మనసులో క్రోధాన్ని రానీయవద్దు. మనసులో క్రోధము జనించితే నీ మనసు నిన్ను జీవిత లక్ష్యాన్నుండి ప్రక్కకు తొలగించి నిన్ను పాతాళములో త్రోసివేస్తుంది.

అందుచేత మనము మన మనసును మంచి మార్గములోనే యుంచాలి. ఆమార్గము గురించే తెలుసుకోవాలి.

(యింకా ఉంది)
సర్వం శ్రీ సాయినాధార్పణమస్తు

సాయి.బా.ని.స. డైరీ - 1994 (30)

2012-02-18T07:49:00.013-08:00

18.02.2012 శనివారము

ఓం సాయి శ్రీ సాయి జయజయ సాయి
ఈ రోజు సాయి.బా.ని.స. డైరీ - 1994 30 వ.భాగాన్ని చదువుకుందాము

సాయి.బా.ని.స. డైరీ - 1994 (30)

22.10.1994

నిన్నటి రాత్రి నిద్రకు ముందు "నాలోని అజ్ఞానాన్ని తొలగించు తండ్రి" అని సాయినాధుని వేడుకొన్నాను. శ్రీ సాయి దృశ్యరూపములో తెలిపిన విషయాల సారాంశము.

1) పిల్లలను పెంచి పెద్ద చేయటము తల్లితండ్రుల బాధ్యత . వృధ్ధులైన తల్లిదండ్రుల సేవ చేయటము పిల్లల కర్తవ్యము. అని గ్రహించు.

2) నీవు ఋణానుబంధానుసారము ఎవరికైన సహాయము చేసిన అది నీకు ఋణవిముక్తిని కలిగించుతుంది. అది నీకు లభించిన అదృష్టము. నీవలన సహాయము పొందినవారు నిన్ను గుర్తించటము లేదు అనే భావన నీనుండి నీవు తొలగించవలసిన అజ్ఞానము.

3) ఈ జీవితములో అన్నదానము చేయగలగటము చాలా అదృష్టము. అన్నదానము చేయడానికి డబ్బు ఖర్చు అగుతుంది అని అన్నదానము చేయటానికి వెనకాడరాదు.

నీవు ఈ లోకము నుండి నిష్క్రమించే సమయములో డబ్బు నీతో రాదు. అన్నదాన ఫలమే నీతో వస్తుంది అని గ్రహించు. - శ్రీ సాయి -

27.10.1994

నిన్న రాత్రి శ్రీ సాయినాధులు కలలో యిచ్చిన సందేశము "ధనము మీద వ్యామోహము ఉన్నంత కాలము పరస్త్రీ వ్యామోహము పోదు.

ఎలాగ అంటే రూపాయి నోటుమీద కంటికి కనిపించని వాటర్ మార్క్ లో ముద్రించబడిన సిం హము ముద్రవంటిది ఈ పరస్త్రీ వ్యామోహము. అందుచేత ముందుగా ధన వ్యామోహాన్ని వదిలించుకో. - శ్రీ సాయి -

28.10.1994

నిన్నటి రాత్రికలలో శ్రీ సాయి చూపిన దృశ్యాలు నాలో ఆధ్యాత్మిక భావాలను రేకెత్తించినది. వాటి వివరాలు. జీవితము ఒక పూలచెట్టు విత్తనములాగ ప్రారంభము అగుతుంది. ఆ విత్తనము చక్కటి నేలలో పడి వానకు తడిసి మొక్క అయి పెరిగి చక్కటి పూవులను ప్రసాదించుతుంది.

ఆపూలు వాటి అదృష్టానుసారము కొన్ని భగవంతుని పాదాల చెంతకు చేరి ఎండిపోతాయి.

మరికొన్ని మానవుల పాదాలక్రిద నలిగి ఎండిపోతాయి.

ఈ విధముగా ఎండిపోయిన పూలు గాలికి దూరముగా కొట్టుకొని వెళ్ళి తమ గమ్య స్తానాలు చేరుతాయి. అక్కడ భగవంతుని అనుగ్రహము అనే వానజల్లు ఆ ఎండిన పూల మీద పడి తిరిగి పూల మొక్కలగా మారిపోయినవి. నిద్రనుండి మెలుగువ వచ్చినది.

ఈ దృశ్యము ద్వారా శ్రీ సాయి యిచ్చిన సందేశము ఏమిటి? అని ఆలోచించినాను. నా మనసులో సమాధానము దొరికినది. మానవ జీవితము ఒక పూలమొక్క లాంటిది. ఆమొక్కకు పూచిన పూవులు వాటి అదృష్టానుసారము పరిమళించి కొన్ని భగవంతుని పాదాల దగ్గరకు మరికొన్ని తోటి మానవుల పాదాల క్రిందకు చేరుతాయి.

(యింకా ఉంది)
సర్వం శ్రీ సాయినాధార్పణమస్తు

సాయి.బా.ని.స. డైరీ - 1994 29

2012-02-17T06:11:00.000-08:00

17.02.2012 శుక్రవారము

ఓం సాయి శ్రీ సాయి జయజయ సాయి
సాయి బంధువులకు బాబావారి శుభాశీస్సులు

ఈ రోజు సాయి.బా.ని.స. డైరీ - 1994 29 వ. భాగము చదువుకుందాము

సాయి.బా.ని.స. డైరీ - 1994 (29)

10.10.1994

నిన్న రాత్రి శ్రీ సాయికి నమస్కరించి నిద్రపోయినాను. శ్రీ సాయి అజ్ఞాత వ్యక్తి రూపములో యిచ్చిన సందేశములు.

1) సంసారము - బరువు బాధ్యతలు శాశ్వతము కాదు. శాశ్వతమైనది (భగవంతుడు) ఏమిటి? అనేది తెలుసుకొని జీవించు.

2) జీవితంలో అప్పు చేసి బహుమతులను ఎవరికి ప్రదానము చేయకు. వాళ్ళ "మెహర్బాని" మాట భగవంతునికి తెలుసు. అప్పులవాళ్ళనుండి వచ్చే బాధ నీకు మాత్రమే తెలుసు. - శ్రీ సాయి -

12.10.1994

నిన్నటిరోజున మా కుటుంబమునకు ఆత్మీయులు అయిన శ్రీ నాగరాజరావు గారి మరణవార్త విన్నాను. మనసులో చాలా బాధ కలిగినది. జననము - మరణము గురించి చాల ఆలోచించినాను. రాత్రి నిద్రకు ముందు శ్రీ సాయికి నమస్కరించి సాయినాధ పునర్జన్మ గురించి వివరాలు చెప్పు తండ్రి అని వేడుకొన్నాను. శ్రీ సాయి దృశ్యారూపములో తెలిపిన వివరాలు. 1) ఆత్మ శరీరాన్ని వదలిన తర్వాత శరీరము పంచభూతాలలో కలసిపోతుంది. 2) ఆత్మ పదిరోజుల తర్వాత ఋణానుబంధాను సారముగా గర్భవతి అయిన స్త్రీ మూర్తి గర్భములోని పిండములో ప్రవేశించి నూతన జన్మకు నాంది పలుకుతుంది. 4) ఆతల్లి గర్భాన్ని నవమాసాలు మోసిన తర్వాత నూతన ప్రాణికి జన్మ యిస్తుంది. అదే పునర్జన్మ. 5) కొంతమంది స్త్రీలు అవివాహితులుగా యుండిపోతారు. కొంతమంది స్త్రీలు వివాహము చేసుకొన్నా గర్భవతి కాలేరు. ఆత్మ అటువంటి స్త్రీలనుండి దూరముగా తిరుగుతుంది. 6) ప్రమాదాలలో మరణించినవారికి ఈ ఋణానుబంధాల సిద్ధాంతాలు వర్తించవు. ప్రమాదములో మరణించినవారు ఆసమయములో దగ్గరలో ఉన్న గర్భవతి గర్చములోగాని, జంతు గర్భములో గాని ప్రవేశించి పునర్జన్మ పొందుతారు. చనిపోయినవారి గురించి శోకించటములో అర్ధములేదు పుట్టిన ప్రతివాడు ఒకరోజున మరణించక తప్పదు. మనిషి చనిపోయిన తర్వాత అతని ఆత్మ తిరిగి గర్భవతి గర్భములో ప్రవేశించిన రోజే నిజమైన పుట్టినరోజు. ఈ నిజమైన పుట్టినరోజు ఎంతమందికి తెలుసు, ఆలోచించు.

13.10.1994 సమయం 1500 (అవర్స్) (3.00 పీ.ఎం.)

ఈరోజు మధ్యాహ్న్నము నిద్రలోని కలలో శ్రీ సాయి నామిత్రుడు శ్రీ బీ.ఎన్. మూర్తి రూపములో దర్శనము యిచ్చి అన్నారు.

"నేను మైన్ రోడ్డుదగ్గర యిల్లు కట్టుకోవటానికి స్థలము కొన్నాను.ఒకసారి చూడటానికి వచ్చి వెళ్ళు." నిద్రనుండి మెలుకువ వచ్చినది. సాయంత్రము ఏడుగంటలకు నేను నాయింటి ముందు నిలబడినాను. సాయి బంధువు శ్రీ సుందరరావు గారు నాదగ్గరకు వచ్చి అన్న మాటలు "నేను కమలానగర్ మైన్ రోడ్డు ప్రక్కన ఫ్లాట్ కొన్నాను. ఈరోజు ఉదయమే గృహప్రవేశము చేసినాను. దయచేసి మా నూతన గృహములో ఈ రోజు రాత్రి జరిగే శ్రీ సాయి హారతికి వచ్చి శ్రీ సాయికి మీ చేతుల మీదగా హారతి యివ్వమని కోరుతున్నాను." ఈ మాటలు వింటూ యుంటే మధాహ్న్నము కలలో శ్రీ సాయి అన్నమాటలు గుర్తుకు వచ్చినవి. రాత్రి శ్రీ సుందరరావుగారి నూతన గృహమునకు వెళ్ళి రాత్రి హారతి యిచ్చినాను.

ఈ సంఘటన శ్రీ సాయి సత్ చరిత్ర 30వ. అధ్యాయములోని రహతా కుశాల్ చంద్ స్వప్నమును గుర్తు చేసినది. శ్రీ సాయిబాబా స్వప్నములకు కాలనియమములు లేవు అని మరొక్కసారి నిర్ధారణ జరిగినది.

14.10.1994 విజయదశమి : సమయం 11.30 ఏ.ఎం.

శ్రీ సాయి నిరాకారుడు అనే ఉద్దేశముతో శ్రీ సాయి సత్ చరిత్రలో 28 వ. అధ్యాయములో శ్రీ సాయి మేఘశ్యామునితో అన్నమాటలను ఒక కాగితముపై వ్రాసి పటము కట్టించినాను. ఆ మాటలు "నాకు రూపములేదు. నేను అన్ని చోట్ల నివసించుచున్నాను." ఆపటమును హాలులోని టీ.వీ. వెనుక వ్రేలాడదీసి నమస్కరించి, టీ.వీ.ని ఆన్ చేసినాను (ప్రారంభించినాను.) టీ.వీ.తెరమీద కనిపించిన బొమ్మ నన్ను ఆనందములో ముంచివేసినది. ఆ బొమ్మ నాయిష్ఠ దైవము శ్రీ సాయినాధునిది. ఆ బొమ్మ క్రింద అక్షరాలు "శ్రీ సాయికృష్ణ క్రియేషన్స్ సమర్పించు" అన్నవి. శ్రీ సాయి అన్ని చోట్ల నివసించుచున్నారు అనుటకు నిదర్శనము.

21.10.1994

నిన్నటిరోజున ఆధ్యాత్మిక రంగములో ముందుకు పయనించటానికి తెలుసుకోవలసిన విషయాలపై ఆలోచించినాను. రాత్రి నిద్రకు ముందు శ్రీ సాయికి నమస్కరించి ఆధ్యాత్మిక రంగములో అభివృధ్ధికి తెలుసుకోవలసిన మంచి విషయాలు తెలియచేయమని వేడుకొన్నాను. శ్రీ సాయి చూపిన దృశ్యాల సారాంశము.

"ఉన్నత భావాలతో ఉన్నతమైన పదవులు అలంకరించి, పదవి విరమణ తర్వాత సంకుచిత భావాలతో బ్రతకటము అంటే తన్నుతాను మోసగించుకోవటమే. అటువంటి బ్రతుకు బ్రతికినా బతకకపోయినా ఒకటే. అటువంటివారు ఆధ్యాత్మిక జీవనానికి అర్హత లేనివారు అని గుర్తుంచుకోవాలి. -శ్రీ సాయి -

(యింకా ఉంది)
సర్వం శ్రీ సాయినాధార్పణమస్తు

సాయి.బా.ని.స. డైరీ - 1994

2012-02-16T08:49:00.000-08:00

16.02.2012 గురువారము
ఓం సాయి శ్రీ సాయి జయజయ సాయి
సాయిబంధువులకు బాబావారి శుభాశీస్సులు

ఈ రోజు సాయి.బా.ని.స. డైరీ - 1994 28 వ.భాగాన్ని చదువుకుందాము

సాయి.బా.ని.స. డైరీ - 1994 (28)

05.10.1994

నిన్నటిరోజున నా దగ్గర బంధువుతో ఉన్న శత్రుత్వము గురించి ఆలోచించినాను. శ్రీ సాయి తత్వము ప్రకారము ఈ జన్మలోనే శత్రుత్వము వదిలించుకోవాలి. లేని యెడల అది మరుజన్మలో కూడ తల ఎత్తుతుంది. ఏమి చేయాలి అనే ఆలోచనలతో రాత్రి నిద్రకు ముందు శ్రీ సాయి సలహా కోరి నిద్రపోయినాను. శ్రీ సాయి కలలో చూపిన దృశ్యాల సారాంశము. 1) నేను ముషీరాబాద్ జైలులో నా తప్పులకు శిక్ష అనుభవించి బయటకు వచ్చినాను. జైలు నుండి బయటకు వచ్చినానే కాని మనసులో పగ చల్లారలేదు. నేను జైలులో కష్ఠపడి పని చేఇనందులకు నాకు ప్రభుత్వమువారు యిచ్చిన ధనముతో ఒక తుపాకీని కొని నా శత్రువును కాల్చి చంపాలి అనే ఆలోచన కలిగినది. ఈ విషయము నా భార్యకు చెప్పినాను. ఆమె నాకు చీవాట్లు పట్టి "మీకు కళ్ళు సరిగా కనిపించని వయసు. యింక పంతాలు పట్టింపులు మాని వేయండి. మీరు మీ పగను వదలకపోతే తిరిగి జైలుకు వెళ్ళవలసియుంటుంది ఆలోచించుకోండి" అన్నది. నిద్రనుండి ఉలిక్కిపడి లేచినాను. నాగదిలో ఉన్న శ్రీ సాయి పటముముందు కూర్చుని ఆలోచించసాగినాను. క్రిందటి జన్మలోని శత్రుత్వమునకు ఈ జన్మలో మానసికముగా చాలా శిక్ష అనుభవించినాను. ఈ శిక్ష అనుభవించిన తర్వాత కూడ యింకా పగ వైషమ్యాలకు పోతే తిరిగి జైలుకు వెళ్ళవలసి యుంటుంది. అంటే వచ్చే జన్మలో కూడ ఈ శత్రుత్వము దానికి శిక్ష అనుభవించవలసి యుంటుంది. అందుచే ఈ శత్రుత్వమును ఈ జన్మలోనే అంతము చేసుకోవాలి లేదా శ్రీ సాయి సత్ చరిత్రలో శ్రీ సాయి చెప్పిన కధలలోని వీరభద్రప్ప (పాము), చెన్నబసప్ప (కప్ప) లాగ బాధపడాలి. అందుచేత ఈ జన్మలోనే శత్రుత్వము వదలించుకోవాలి అని నిశ్చయించుకొన్నాను.

06.10.1994

నిన్నటిరోజున ధైర్యముగాను. ప్రశాంతముగాను బ్రతకటము గురించి ఆలోచించినాను. నా మనసుకు సమాధానము దొరకలేదు. రాత్రి నిద్రకు ముందు శ్రీ సాయికి నమస్కరించి సమాధానము యివ్వమని వేడుకొన్నాను. శ్రీ సాయి దృశ్యరూపములో యిచ్చిన సందేశముయొక్క సారాంశము.

1) మా ఆఫీసులోని నా పై అధికారి మీటింగులో నన్ను అనవసరముగా అవహేళన చేసినారు. నా మనసు చాలా బాధపడినది. నేను సహనమును కోల్పోకుండ జాగ్రత్తగా నెమ్మదిగా నాపై అధికారికి అతని తప్పు గురించి చెప్పినాను ఈ విధముగా పదిమందిలో తప్పు, ఒప్పులను ధైర్యముగా చెప్పగలగటము శ్రీ సాయి శక్తి అని గ్రహించినాను.

2) నేను నా భార్య ఆధ్యాత్మిక రంగములో కలసి ప్రయాణము చేయటానికి తీర్ధయాత్రలకు బయలుదేరినాము. ఒక పుణ్యక్షేత్రములో శ్రీ సాయిని పోలిన ఒక సన్యాసి కలసి అన్న మాటలు. "నీవు నీ భార్యతో కలసి తీర్ధ యాత్రలు మాత్రమే చేయగలవు. కాని ఆధ్యాత్మిక రంగములో నీవు ఒక్కడివే ప్రయాణము చేయాలి. ఆధ్యాత్మిక రంగములో ప్రయాణము తీర్ధయాత్రల ప్రయాణము అంత సులభమైనది కాదు. ఈ అధ్యాత్మిక మార్గము మిగుల కఠినమైనది. కావలసినంత కృషి చేయవలసియుండును. " నిద్రనుండి మెలుకువ వచ్చినది. శ్రీ సాయి సత్చరిత్రలో 21 వ. అధ్యాయములో శ్రీ సాయి శ్రీ వీ.హెచ్.ఠాకూరు గారితో అన్న మాటలు గుర్తుకు వచ్చినవి. జీవితములో ప్రశాంతముగా బ్రతకాలి అని ఉంది. ఆధ్యాత్మిక శక్తిని ప్రసాదించమని శ్రీ సాయిని వేడుకోవాలి అని నిశ్చయించుకొన్నాను.

09.10.1994

నిన్నటిరోజున ధైర్యము, అధైర్యముల గురించి ఆలోచించినాను. రాత్రి నిద్రకుముందు శ్రీ సాయికి నమస్కరించి ధైర్యము, అధైర్యముల గురించి వివరించమని వేడుకొన్నాను. శ్రీ సాయి కలలో చూపిన దృశ్యాల వివరాలు. వాటి సారాంశము. "ధైర్యము అనేది నీమనసులోని దాగియున్న శక్తి. అధైర్యము అనేది నీ మానసిక బలహీనత. ఈ రెండు నీలోనే యున్నాయి. వాటికి ఉదాహరణలు చెబుతాను విను" అన్నారు ఒక అజ్ఞాత వ్యక్తి. వాటి వివరాలు.

1) ప్లేగు వ్యాధి సోకిన బిడ్డను ఒడిలో తీసుకొని ఆపసి పాపకు సేవ చేస్తున్న తల్లిని చూడు.

2. పిల్లలు లేకపోయిన అన్యోన్యముగా జీవించుతున్న నీ స్నేహితుని, అతని భార్యను చూడు.
3. టిబెట్ నుండి జీవనోపాధికి చిన్న చిన్న పిల్లలతో వచ్చిన ఆ కాందిశీకులను చూడు.
4. ఈ ఉదాహరణలద్వారా నేను తెలుసుకొన్న విషయము "అధైర్యము అనే మానసిక బలహీనతను నీవు జయించిననాడు, ధైర్యము అనే నీలోని శక్తి ఉద్భవించుతుంది."

(యింకా ఉంది)
సర్వం శ్రీ సాయినాధార్పణమస్తు

సాయి.బా.ని.స. డైరీ - 1994 (27)

2012-02-15T07:45:00.000-08:00

15.02.2012 బుధవారము

ఓంసాయి శ్రీ సాయి జయజయ సాయి
సాయి బంధువులకు బాబావారి సుభాశీస్సులు
ఈ రోజు సాయి.బా.ని.స. డైరీ 1994 27వ భాగాన్ని చదువుకుందాము

సాయి.బా.ని.స. డైరీ - 1994 (27)

29.09.1994

దేశములో (సూరత్) ప్లేగు వ్యాధి విపరీతముగా ప్రబలుచున్నది అనే వార్తలు వినవస్తున్నాయి. రాత్రి భయముతో శ్రీ సాయికి నమస్కరించి ప్లేగువ్యాధి నుండి రక్షణ పొందటానికి మార్గము చూపమని వేడుకొన్నాను. శ్రీ సాయి చూపిన దృశ్యాల వివరాలు 1) సమాజములో చెడు అలవాట్లు పెరుగుతున్నపుడు వ్యాధులు అనే ఆయుధమువలన సామూహిక మరణాలు సంభవించును 2) ఆటలలో ఆరోగ్యవంతులే విజయము సాధించుతారు. అనారోగ్యముతో వ్యాధులతో ఉన్నవారు మరణానికి తలవంచుతారు. 3) అంటువ్యాధులు బాగా ప్రబలుతున్న ప్రాతాలలో ఎక్కువగా ప్రయాణాలు చేయవద్దు. విందులు, వినోదాలలో పాల్గొనవద్దు 4) నీయింటి పరిసర ప్రాంతాలను శుభ్రముగా ఉంచుకొని వేపచెట్టు గాలి పీల్చు.

30.09.1994

నిన్నటిరోజున గృహస్థ ఆశ్రమము, సన్యాస ఆశ్రమము గురించి ఆలోచించినాను. రాత్రి నిద్రకు ముందు శ్రీ సాయికి నమస్కరించి గృహస్థ ఆశ్రమములో యుంటూ సన్యాసిలాగ బ్రతకటము గురించి తెలపమని వేడుకొన్నాను. శ్రీ సాయి దృశ్యరూపములో యిచ్చిన సూచనలు వాటి వివరాలు.

1) నీ బరువు బాధ్యతలు నిర్వర్తించటానికి మాత్రమే ఆలోచించు.

2) అనవసరపు విషయాలలో జోక్యము చేసుకోవద్దు.

3) ఆహారములో రుచులకు పోవద్దు.

4) పరుల సొమ్ము ఆశించవద్దు

5) పరస్త్రీల గురించి ఆలోచించవద్దు.

6) నీయింటనే ప్రశాంతముగా జీవించాలి అనే కోరికతో భగన్ నామ స్మరణ చేస్తూ జీవించాలి.

01.10.1994

నిన్నటిరోజున శ్రీ సాయి తత్వము గురించి, శ్రీ సాయి శిరిడీలో జీవించిన కాలములోని సంఘటనలు గురంచి ఆలోచించినాను. రాత్రి నిద్రకు ముందు శ్రీ సాయికి నమస్కరించి "సాయిబంధువులు ఆచరించవలసిన ముఖ్య విషయములు చెప్పు తండ్రీ" అని వేడుకొన్నాను. శ్రీ సాయి చూపిన దృశ్యాలు సారాంశము.

1) నీకంటె బలవంతుడు నీచేత తప్పుడు పనులు చేయించటానికి పయత్నాలు చేస్తూ ఉన్నపుడు దానిని నీవు గ్రహించగలగిననాడు, ఆ తప్పుడు పనులు చేయటముకంటే అటువంటి బలవంతుల నుండి దూరముగా యుండటము ఉత్తమ మార్గము.

2) ఎవరినైన వంచన చేసి జీవించటము పాపము, ఆత్మవంచన చేసుకొని జీవించటము మహాపాపము.

02.10.1994

నిన్నరాత్రి నిద్రకు ముందు శ్రీ సాయ్కి నమస్కరించి, ఆధ్యాత్మిక విషయాలు చెప్పమని వేడుకొన్నాను. శ్రీ సాయి చూపిన దృశ్యాల సారాంశము.

1) భగవంతుని తెలుసుకోవాలనె తపనతో ఆధ్యాత్మిక రంగములో ప్రవేశిస్థాము. ఆధ్యాత్మిక విషయాలు తెలుసుకొంటు సాధన చేయడము ద్వారా ఆధ్యాత్మిక శక్తిని పొందుతాము. అటువంటి సమయములో చిన్న చిన్న విజయాలను సాధించుతాము. ఆ విజయాలను సాధించినాము అనే గర్వముతో భగవంతుని ఉనికిని మర్చిపోయి పతనము చెందుతాము. అందుచేత ఆధ్యాత్మిక రంగములో ప్రయాణము చేసేటప్పుడు మనలోని అహంకారాన్ని ముందుగా సద్గురుని పాదాల దగ్గర విడిచి ముందుకు సాగిపోవాలి.

2) ఆధ్యాత్మిక రంగములో ప్రయాణము చేసేవానికి తోడుగా బంధువులు, మిత్రులు రారు. సద్గురువు చూపు కాంతి కిరణాలుగా మన ప్రయాణములో సహాయపడతాయి.

(యింకా ఉంది)
సర్వం శ్రీ సాయినాధార్పణమస్తు

సాయి.బా.ని.స. డైరీ - 1994 (26)

2012-02-14T07:02:00.000-08:00

14.02.2012 మంగళవారము

ఓం సాయి శ్రీ సాయి జయజయ సాయి

సాయి బంధువులకు బాబావారి శుభాశీస్సులు

ఈ రోజు సాయి.బా.ని.స. డైరీ - 1994 26వ. భాగాన్ని చదువుకుందాము.

సాయి.బా.ని.స. డైరీ - 1994 (26)

19.09.1994

నిన్నటిరోజున శ్రీ సాయి అడుగుజాడలలో నడవాలని ఆలోచన వచ్చినది. రాత్రి ఆ విషయముపై చాలా ఆలోచించి నిద్రకు ముందు శ్రీ సాయికి నమస్కరించి సలహా ఇవ్వమని వేడుకొన్నాను. శ్రీ సాయి అజ్ఞాత వ్యక్తి రూపములో అన్న మాటలను సలహాలుగా స్వీకరించినాను. వాటి వివరాలు.

1) పరస్త్రీ వ్యామోహము వదలిపెట్టు. 2) పట్టు పరుపులకై ప్రాకులాడక నేలమీద నిద్ర్రించటము నేర్చుకో. 3) భోజనములో రుచులకు పోవద్దు. 4) నీ జీవితములో నీ అవసరాలకు వస్తువులను గాని, ధనమునుగాని దొంగిలించరాదు. 5) రోగముతో బాధపడుతున్న రోగులకు (కుష్ఠురోగులకు) సహాయము చేయవలెను. 6) నీ హోదాను మరచి ఉన్నత హోదా కలిగిన వారితో స్నేహము చేయరాదు. 7) యితరుల మనసును నొప్పించకుండ జీవించాలి. 8) విశ్వాసానికి మారు పేరు కుక్క అని గుర్తు ఉంచుకోవాలి.

23.09.1994

నిన్నటిరోజున శ్రీ సాయి తత్వము, శ్రీ సాయి సందేశాలు గురించి ఆలోచించినాను. రాత్రి నిద్రకు ముందు శ్రీ సాయికి నమస్కరించి సాయి బంధువులకు సందేశము ప్రసాదించమని వేడుకొన్నాను. శ్రీ సాయి అజ్ఞాత వ్యక్తి రూపములో దర్శనము యిచ్చి ప్రసాదించిన సందేశాలు.

1) శ్రీ సాయి పూజను ఏకాంతముగా ప్రశాంతముగా చేయి. శ్రీ సాయి పేరిట సేవను సాయి బంధువులతో కలసి చేయి. 2) నిజ జీవితములో నీప్రక్కవాడికి ముందుగా భోజనము పెట్టి ఆతర్వాత నీవు భోజనము చేయి. ఆధ్యాత్మిక జీవితములో నీవు ముందుగా ఆధ్యాత్మిక భోజనము చేసి, జీర్ణించుకొని తర్వాతనే నీ ప్రక్కవాడికి ఆధ్యాత్మిక భోజనము పెట్టు. - శ్రీ సాయి.

24.09.1994

నిన్నటిరోజున శ్రీ సాయి తత్వములో కొత్త విషయాలు తెలుసుకొన్నాను. యింకా శ్రీ సాయి తత్వము తెలుసుకోవాలి అనే తపనతో రాత్రి శ్రీ సాయికి నమస్కరించి ఆధ్యాత్మిక సందేశము యివ్వమని వేడుకొన్నాను. శ్రీ సాయి అజ్ఞాత వ్యక్తి రూపములో యిచ్చిన సందేశాలు. 1) ఆధ్యాత్మిక రంగములో మొదటిసారి నడవటానికి శ్రీ సాయి (మాత) చేయిని ఆసరాగా తీసుకోవాలి. ఒకసారి నడక అలవాటు పడిన తర్వాత స్వతంత్రముగా నడవగలగటానికి కావలసిన ఆశీర్వచనాలను శ్రీ సాయినుండి కోరాలి. నీవు స్వతంత్రముగా ఆధ్యాత్మిక రంగములో నడుస్తున్నపుడు కలిగే కష్ఠసుఖాలను, జయాపజయాలను, కీర్తి అపకీర్తిలను సమదృష్ఠితో చూడగలగిననాడు నీవు నిజమైన సాయి భక్తుడిగా నిలబడగలవు.

24.09.1994 8 ఎ.ఎం.

టీ.వీ.లో శ్రీ సాయి మీద చక్కని కార్యక్రమము ప్రసారము అయినది. అందులో ఒక భక్తురాలు శ్రీ సాయిని కోరిన కోరిక నా మనసులో చోటు చేసుకొంది. "సాయినాధ - నేను నీపాదాల దగ్గర అగరవత్తిని. నీ చిలిం లోని నిప్పుకణముతో నన్ను నేను వెలిగించుకొని నీపాదాల దగ్గర భూమిలో బూడిదగా మారి పంచభూతాలలో కలసిపోనీ."

(యింకా ఉంది)
సర్వం శ్రీ సాయినాధార్పణమస్తు

సాయి.బా.ని.స. డైరీ - 1994 (25)

2012-02-09T23:57:00.000-08:00

10.02.2012

ఓం సాయి శ్రీ సాయి జయజయ సాయి
సాయి బంధువులకు బాబావారి శుభాశీస్సులు
ఈ రోజు సాయి బా ని స డైరీ - 1994 25 వ. భాగాన్ని చదువుకుందాము

(ఈ రోజు తిరుపతి యాత్రకు వెడుతున్న కారణంగా మరల ప్రచురణ 14 తారీకు)

సాయి.బా.ని.స. డైరీ - 1994 (25)

13.09.1994

నిన్నటిరోజున కష్ఠ సుఖాలు - వివేకము - వైరాగ్యము గురించి చాలా ఆలోచించినాను. రాత్రి నిద్రకు ముందు శ్రీ సాయికి నమస్కరించి కష్ఠ సుఖాలు - వివేక వైరాగ్యాల గురించి వివరించమని వేడుకొన్నాను. శ్రీ సాయి కలలో చూపిన దృశ్యాల వివరాలు. 1) కష్ఠాలు సుఖాలు అనేవి మన నడవడికతోనే వస్తాయి. మన నడవడికను జాగ్రత్తగా అదుపులో ఉంచుకోవలసినది మనమే. అందుచేత మన కష్ఠ సుఖాలకు కారణం యింకొకరు అని అనడములో అర్ధములేదు.

2) బత్తాయిపండ్లను వ్యాపారి (శ్రీసాయి) నుండి మనము కొనగలము. ఆ పండ్లను బిలచి యివ్వమని ఆ వ్యాపారిని మనము కోరవచ్చు. ఆ తర్వాత ఆ పండ్లలోని తొనలను తినవసినది, రసమును త్రాగవలసినది మనే అని గ్రహించటము వివేకమునకు మూలము.

3) మన జీవితము ఏడు అంతష్తుల మేడవంటిది. మొదటి ఆరు అంతస్థులు అరిషడ్ వర్గాలు. ఏడవ అంతస్థు మాత్రము (శిరస్సు) ఏడు ద్వారాలు కలిగియుండి భగవంతునికి చేరువలో యుంటుంది. శ్రీ సాయి ఈ ఏడు అంతస్థుల భవనానికి లిఫ్ట్ వంటివారు. వారు మనలను ఏడవ అంతస్తుకు చేర్చటానికి సిధ్ధముగా యండగా మన భార్యపిల్లలు ఆ లిఫ్ట్ ను మొదటి ఆరు అంతష్తుల మధ్యనే తిరగనిస్తూ ఉంటారు. ఏడవ అంతస్థులోనికి వెళ్ళనీయరు. నీవే ధైర్యము చేసి ఆ లిఫ్ట్ ద్వారా ఏడవ అంతష్తుకు చేరాలి అని గ్రహించటము వైరాగ్యమునకు మూలము.

14.09.1994

నిన్నటిరోజున శ్రీ సాయి తత్వము గురించి, వాటిని ఆచరణలో పెట్టడము గురించి చాలా ఆలోచించినాను. రాత్రి నిద్రకు ముందు శ్రీ సాయికి నమస్కరించి నా సమస్యకు సమాధానము తెలియచేయమని వేడుకొన్నాను. శ్రీ సాయి అజ్ఞాత వ్యక్తి రూపములో (పల్లెటూరివాని రూపములో) తత్వాలుపాడుకొంటు నాముందరనుండి వెళుతున్నారు.

నేను ఆయనను ఆపి, తత్వాలు అంత చక్కగా మర్చిపోకుండ ఎలాగ పాడగలగుతున్నారు అని అడిగినాను. ఆవ్యక్తి అంటారు - "తత్వాలు కంఠస్థము చేయటము గొప్పకాదు. ఆ తత్వాలను ఆచరణలో పెట్టడము గొప్ప విషయము. అందుచేత తత్వాలు రోజూ వల్లె వేసుకొంటూ వాటిని జీవితములో ఆచరణలో పెట్టిననాడు జీవితములో చికాకులు యుండవు. రోజూ నీవు త్రాగే మంచినీరు ఒకే సరస్సులోనివి అయిఉండాలి. నీవు ఎక్కడికి వెళ్ళినా ఆసరస్సులోని నీరు నీతో సీసాలలో తీసుకొని వెళ్ళివాటినే త్రాగాలి. ఆ విధముగా ఒకే సరస్సులోని నీరు నీవు త్రాగిననాడు నీ ఆధ్యాత్మిక దాహము త్వరలో తీరుతుంది." నిద్రనుండి మెలుకువ వచ్చినది. శ్రీ సాయికి నమస్కరించినాను. ఒకే సరస్సులోని నీరు అంటే ఏమిటి అని ఆలోచించినాను. "శ్రీ సాయి సత్ చరిత్ర" అని మనసులో సమాధానము దొరికినది.

16.09.1994

నిన్నటిరోజున మీర్పేటలోని శ్రీ సాయి గుడికి వెళ్ళి 101 రూపాయలు దక్షిణగా వేసినాను. రాత్రి నిద్రకు ముందు శ్రీ సాయికి నమస్కరించి ఆశీర్వదించమని వేడుకొన్నాను. శ్రీ సాయి కలలో మా ఆఫీసులోని కార్మిక నాయకుడు శ్రీ షేక్ పాం షావలి రూపములో దర్శనము యిచ్చి నా చేతిసంచిని బలవంతముగా తీసుకొన్నారు. ఆ చేతిసంచిలో శ్రీ సాయితో నా అనుభవాలు వ్రాసుకొన్న డైరీ యున్నది. ఆ డైరీ నాప్రాణముతో సమానమైనది. నా డైరీ నాకు యివ్వమని వేడుకొన్నాను. అతను తనకు 100 రూపాయలు యిస్తే ఆ డైరీ యిస్తాను అంటారు. నాకు నిద్రనుండి మెలుకువ వచ్చినది. నిన్నటిరోజునే కదా శ్రీ సాయికి 101 రూపాయలు దక్షిణ యిచ్చినది మరి శ్రీ సాయి తిరిగి 100 రూపాయలు ఎందుకు దక్షిణ కోరుతున్నారు అని ఆలోచించినాను. నిజానికి 30.08.1994 నాడు రాత్రి కలలో శ్రీ సాయి ట్రాఫిక్ పోలీసు రూపములో దర్శనము యిచ్చి "నీవు పోగొట్టుకొన్న తెల్ల హెల్మెట్ యిదిగో" అని నా హెల్మెట్ నాకు యిచ్చి తనకు 200 రూపాయలు ద్క్షిణ యివ్వమని అడిగినారు. నేను అతితెలివితేటలుకు పోయి నిన్నటి రోజున 101 రూపాయలు దక్షిణ యిచ్చినాను. శ్రీ సాయి మిగిలిన 100 రూపాయలు శ్రీ పాన్ షావలి రూపములో దక్షిణ కోరుతున్నారు అని గ్రహించినాను. ఈ రోజు సాయంత్రము తిరిగి మీర్పేటలోని శ్రీ సాయి గుడికి వెళ్ళి శ్రీ సాయికి మిగిలిన 100 రూపాయలు దక్షిణ యివ్వాలని నిశ్చయించుకొన్నాను.

17.09.1994

నిన్నటిరోజున శ్రీ సాయిబందు శ్రీ ఆలూరి గోపాలరావుగారి నుండి జాబు వచ్చినది. ఆజాబుకు ఏమని సమాధానము యివ్వవలసినది అని శ్రీ సాయినాధుని తెలపమని వేడుకొన్నాను. రాత్రి కలలో శ్రీ సాయి మందిరాలకు అనుబంధముగా అనాధ ఆశ్రమాలు కనిపించినవి. ఒక అజ్ఞాతవ్యక్తి శ్రీ సాయిమందిరము దగ్గరనిలబడి నాతో అన్న మాటలు. "తల్లితండ్రులు లేక రోడ్డుమీద బ్రతుకుతున్న అనాధ బాల బాలికలను చేరదీసి నాపేరిట కట్టే మందిరాలలో వాళకు ఆశ్రయము యిస్తే నాయజమాని (భగవంతుడు) పిల్లలకు నేను సేవ చేసుకొనే భాగ్యము నాకు ప్రసాదించేవాళ్ళు అగుతారు మీరు"

ఈ మాటలకు నిద్రనుండి మెలుకువ వచ్చినది. శ్రీ సాయి పటముముందు నిలబడి ఆ అజ్ఞాతవ్యక్తి (శ్రీ సాయి) అన్నమాటలును శ్రీ ఆలూరి గోపాలరావుగారికి వ్రాయాలని నిశ్చయించుకొన్నాను.

(యింకా ఉంది)
సర్వం శ్రీ సాయినాధార్పణమస్తు

సాయి.బా.ని.స. డైరీ - 1994 (24)

2012-02-08T17:21:00.000-08:00

09.02.2012 గురువారము
ఓం సాయి శ్రీ సాయి జయజయ సాయి

సాయి బంధువులకు బాబావారి శుభాశీస్సులు

ఈ రోజు సాయి.బా.ని.స. డైరీ - 1994 - 24వ. భాగాన్ని చదువుకుందాము

సాయి.బా.ని.స. డైరీ - 1994 (24)

30.08.1994

నిన్నటిరోజున మానసికముగా చాలా బాధపడినాను. జీవితముపై విరక్తి కలిగినది. బ్రతకాలని కోరిక మనసులో ఉంది. రాత్రి నిద్రకు ముందు శ్రీ సాయికి నమస్కరించి "సాయినాధ జీవించటానికి కావలసిన ధైర్యము ప్రసాదించు తండ్రి" అని వేడుకొన్నాను. శ్రీ సాయి కలలో చూపిన దృశ్యము నాకు చాలా ధైర్యమును కలిగించినది. వాటి వివరాలు. "అది 1962 సంవత్సరము. భారత చైనాల యుధ్ధము మంచు కొండలలో జరుగుతున్నది. నేను భారత సైన్యములో చేరి యుధ్ధము చేయసాగినాను.

చైనీయులతో యుధ్ధము చేస్తు నేను దారి తప్పి ఒక చిన్న గ్రామమునకు చేరినాను. అక్కడ యున్న ఒక బౌధ్ధలామ యింటిలో తలదాచుకొన్నాను. నాలాగ దారితప్పి నిస్సహాయముగా ఒక ముస్లిం ఆఫీసరు, క్రైస్థవ ఆఫీసరు కూడ అయింటిలో తలదాచుకొన్నారు. ఆ యింటిలో ఒక పంజాబీ స్త్రీ తన తప్పిపోయిన భర్త రాక కోసము ఎదురు చూడసాగినది. ఆ బౌధ్ధలామా ప్రేమ మాకు కావలసినంత ధైర్యము ప్రసాదించినది. యింతలో చైనావారు నన్ను పట్టుకోవటానికి ఆయింటిని చుట్టు ముట్టినారు. ఆయింటిలోని భారతీయులందరు ఆ బౌధ్ధలామ ఆశీర్వచనాలతో ధైర్యముగా నిలబడి యుధ్ధము చేసి ఆ చైనీయులను తరిమి కొట్టినాదు. ఒక్కసారిగా తెలివి వచ్చినది. నిద్రనుండి లేచి శ్రీ సాయి పటమునకు నమస్కరించినాను. ఆ సమయములో శ్రీ సాయి పటములో శ్రీ సాయికి బదులు బౌధ్ధ లామ కనిపించినారు. శ్రీ సాయి ఆశీర్వచనములతోను నాతోటి ఆధ్యాత్మిక మిత్రుల సహాయముతో నా మానసిక శత్రువులను (చైనీయులను) తరిమికొట్టి జీవించటానికి కావలసిన ధైర్యమును పొందగలిగినాను.

05.09.1994

నిన్నటిరోజున సంసార బంధాలపై ఆలోచించినాను. రాత్రి నిద్రకు ముందు శ్రీ సాయికి నమస్కరించి ఈ సంసార బంధాలపై సందేశము ప్రసాదించు తండ్రీ అని వేడుకొన్నాను. శ్రీ సాయి రాత్రి కలలో మా ఆఫీసులో పని చేస్తున్న ముగ్గురు వ్యక్తులను వారి సంసార బాధలను చూపించి నాకు కనువిప్పు కలిగించినారు. ఆదృశ్యాలనుండి నేను సేకరించిన సందేశము.

1) జీవితములో బరువు బాధ్యతలను సరిగా నిర్వర్తించాలి అనే తపనతో మొదటి భార్య చనిపోయిన తర్వాత పిల్లలను పెంచి పెద్ద చేసిన తర్వాత, తిరిగి వివాహము చేసుకొని సంసార బంధాలలో మునిగి తేలేవారు కొందరు.

2) జీవితములో బరువు బాధ్యతలను సరిగా నిర్వర్తించాలి అనే తపన లేకుండ మొదటి భార్య పిల్లలు యుండగానే రెండవ భార్యను వివాహము చేసుకొని సంసార బంధాలలో మునిగి తేలేవారు కొందరు.

3) జీవితములో బరువు బాధ్యతలను సరిగ నిర్వర్తించి పిల్లలను పెంచి పెద్ద చేసి, వృధ్ధాప్యములో కూడా యింకా యింకా ధన సంపాదన చేస్తు సంసార బంధాలలో మునిగి తేలేవారు కొందరు.

ఈ మూడు రకాల మనుషులలో నీవు ఏకోవకు చెందుతావు నీవు ఆలోచించుకొని నీ బరువు బాధ్యతలను త్వరగా పూర్తి చేసుకొని సంసార బంధాలనుండి బయటపడు.

11.09.1994

నిన్నటిరోజున ఈ జీవితములో మనకు తోడునీడగా యుండేవారు ఎవరు అని ఆలోచించినాను. రాత్రి నిద్రకు ముందు శ్రీ సాయికి నమస్కరించి ఈ సమస్యకు సమాధానము చెప్పమని వేడుకొన్నాను. రాత్రి కలలో శ్రీ సాయి చూపిన దృశ్యము నాకు కనువిప్పు కలిగించినది. ఆ దృశ్య వివరాలు :

"నేను ఒక రైలులో ప్రయాణము చేయుచున్నాను. నేను ఎక్కిన రైలు పెట్టెలో నిండా జనము యున్నారు. కాని ఒక్కరు నాకు తెలిసినవారు కారు. అందరు కొత్తవారే. ప్రతివారు తమ గమ్యస్థానము (స్టేషన్) గురించి ఎదురు చూస్తూ ప్రయాణము సాగించుతున్నవారే.

రైలు ఆగిన ప్రతి స్టేషన్ లోను కొంతమంది ప్రయాణీకులు మాటమంతి లేకుండ దిగి వెళ్ళిపోతున్నవారే. ఒకే రైలు పెట్టెలో అంత సంతోషముగా మాట్లాడినవారు కనీసము తమ స్టేషన్ వచ్చినది, వెళ్ళి వస్తాము అని మాటకూడ అనకుండ దిగిపోతున్నరే అనే బాధ నాలో ఎక్కువ కాసాగినది. ఆ సమయములో ఆ రైలు పెట్టెలో ఒకమూల కూర్చున్న ముసలి ఆయన (తెల్లని కఫనీ, నెత్తిమీద తెల్లని బట్ట, మెడలో రుద్రాక్షమాల, బుజాన ఒక జోలి వేసికొని యున్న ఆయన) నా దగ్గరకు వచ్చి ఈ రైలు ప్రయాణములో ఒకరికి ఒకరు తోడుగా ప్రయాణము చేయరు. ప్రతివ్యక్తి ఒక్కడిగానే ఈ రైలు ఎక్కుతాడు. రైలులో పదిమందితో కలసి మాట్లాడుతాడు. తన స్టేషన్ రాగానె దిగిపోతాడు. నేను కొన్ని లక్షల సంవత్సరాలనుండి ఈ రైలులో ప్రయాణము చేస్తున్నాను. నేను ఒక్కడినే ఎంతోమందికి తోడుగా ఈ రైలులో ప్రయాణము చేసినాను. నీకు నామీద నమ్మకము యుంటే నాతో స్నేహము చేయి. నేను నీకు తోడుగా ఈ రైలు ప్రయాణములో యుంటాను. నీ స్టేషన్ రాగానే నిన్ను అక్కడ దింపి నీవు నీ గమ్యస్థానము చేరేలాగ చూస్తాను". ఒక్కసారిగా నిద్రనుండి మెలుకువ వచ్చినది. నేను మంచముమీద పరుండి యున్నాను. మరి ఈ రైలు ప్రయాణము సంగతి ఏమిటి అని ఆలోచించసాగినాను.

(యింకా ఉంది)
సర్వం శ్రీ సాయినాధార్పణమస్తు