సాయిబాబాకు వారసులు గాని శిష్యులు గాని లేరు – 4 వ.భాగమ్

     

           

13.07.2020  సోమవారమ్

ఓమ్ సాయి శ్రీసాయి జయజయ సాయి

సాయి బంధువులకు బాబావారి శుభాశీస్సులు.

  బాబా ఎవరినీ తన శిష్యులుగా చేసుకోలేదు,  ఆయనకు వారసులు కూడా లేరు.  ఈ సమాచారమ్ shirdisaisevatrust.org చెన్నై వారినుండి గ్రహింపబడినది.

(సాయిలీల పత్రిక నవంబరు, డిసెంబరు 1983 సంచికలో పునర్ముద్రితం.)

తెలుగు అనువాదం --  ఆత్రేయపురపు త్యాగరాజు

నిజాంపేట,  హైదరాబాద్

ఫోన్.  9440375411 , 8143626744

సాయిబాబాకు వారసులు గాని శిష్యులు గాని లేరు – 4 వ.భాగమ్

(రచయిత కీ.శే. డి. శంకరయ్య)

ఈ వ్యాసాన్ని shirdisaisevatrust.org  నుండి యధాతధంగా అనువాదం చేసి ప్రచురిస్తున్నాను.  అందువల్ల ఇందులో తెలియపరచబడిన అభిప్రాయాలన్నీ శ్రీ శంకరయ్యగారివేనని గ్రహించవలెను.)

బాబా ఎప్పుడు పుట్టారో తెలియదు.  అందువల్ల బాబా జన్మదినం రోజున ఆయన భక్తులు గురుదక్షిణ సమర్పించే సందర్భమే రాదు.  ఆయన జన్మతేదీయే కనక తెలుసుంటే కొంతమంది బాబాలకు వచ్చినట్లుగానే ఆయనకు కూడా లక్షలాది రూపాయలు గురుదక్షిణగా వచ్చి ఉండేవి. 



ఈ బాబాలందరూ గురుదక్షిణకు వచ్చిన సొమ్ముని ఒక మంచి కార్యానికి ఉపయోగిస్తామని చెబుతారు గాని, ప్రతిమానవుడిలోను అంతర్గతంగా ఉన్న శక్తిని మేల్కొలపడంకన్న మంచి కార్యం ఇంకేమన్నా ఉంటుందా?  వారంతా తమ శక్తిని భక్తులలో ఉన్న అజ్ఞానాన్ని తొలగించడానికి ఉపయోగించాలి.  ఒక ఆధ్యాత్మిక గురువు ఉన్నాడంటే అతను తన భక్తులలో ఆధ్యాత్మిక ప్రభావాన్ని కలిగించాలి.  బాబా తన భక్తులనుండి ఆశ్రమాలు గాని మఠాలుగాని, భవనాలను గాను కట్టుకోవాలని ఎప్పుడూ ఆశించలేదు.  ఆయన పాడుబడిన మసీదులోనే నివసించారు.  కాని, మసీదుకు కొన్ని మరమ్మత్తులు జరిగాయి.  బాబా ప్రకృతి మీదనే ఆధారపడ్డారు.  ఇపుడు బాబాలకు ఉన్నట్లుగా ఆయనకు ఏ.సి. లు గాని, ఫానులు గాని లేవు.  భగవంతుడు సూచించిన కొంతమంది భక్తులనుండి మాత్రమే ఆయన దక్షిణ అడిగిపుచ్చుకొనేవారు.  అందులో ఎటువంటి సందేహం లేదు.  ఆయన ఎపుడూ బ్యాంకులో ఖాతా తెరచి డబ్బు దాచుకోలేదు.  బాబా తన భక్తులలో వివేకము, వైరాగ్యము గురించి బోధించడానికే దక్షిణ అడగటంలోని ముఖ్యోద్దేశం.  రోజులో వచ్చిన దక్షిణనంతా సాయంత్రమయేసరికి పంచిపెట్టేసేవారు.  చివరికి ఆయన మహాసమాధి చెందేనాటికి ఏడు రూపాయలు మాత్రమే మిగిలాయి.  వాటిని బాబా అంత్యక్రియల నిమిత్తం ఖర్చు చేసారు.

ఈ విధంగా బాబా నిశ్చింతగా 60 సంవత్సరాలు షిరిడీలో నివశించారు.  మహాసమాధి చెందిన తరువాత కూడా బాబా లీలలను ఎవరయినా తెలుసుకోదలిస్తే సాయిబాబా సంస్థానము వారు ప్రచురించిన శ్రీ సాయిలీల అనే పుస్తకం చదివి తెలుసుకోవచ్చు.  ఇతరులు చెప్పిన అనుభవాలను విని ఆనందపడేకన్నా, మీ మీ అహంకారాలను ప్రక్కన పెట్టి ఆయనకు శరణాగతి చేసినట్లయితే మీకు కూడా ఆయన అనుభవాలనిస్తారు.

మఠాలు/ఆశ్రమాలు ఉన్నాయంటే సాంప్రదాయం ప్రకారం వాటి అధిపతులు తమ తదనంతరం తమ వారసులు ఎవరో ముందే నిర్ణయిస్తూ ఉంటారు.  మన సాయిబాబా ఏభక్తుడిని  కూడా తన తదనంతరం వారసుని గాని, తన శిష్యుడని గాని ప్రకటించలేదు.

సాయిబాబా తరువాత తామే అవతారాలమని చెప్పుకునే గురువులు/బాబాలు/స్వామీజీలు ఈ విషయాలను గురించి తీవ్రంగా ఆలోచించి తమతమ మాయాజాల శక్తులన్నిటినీ ద్వారకామాయిలోని ధునిలో దహింపచేయాలని, క్రొత్తగా ఆధ్యాత్మిక జీవనాన్ని ప్రారంభించి సాయి తత్త్వాన్ని ప్రజలకు అందించాలని సలహా ఇస్తున్నాను.

బాబా తరువాత తమదే అధికారమని, వారసులమని, శిష్యులమని, అవతారాలమనే ప్రామాణికం లేని వాదనలవల్లనే బహుశ సాయి సంస్థానంవారు ‘సాయికి ఎవరూ వారసులు గాని, శిష్యులు గాని లేరు’ అనే ప్రకటనని తమ కార్యాలయంలో ఏర్పాటు చేసి ఉండవచ్చు.

డి. శంకరయ్య

(సమాప్తమ్)
(సర్వం శ్రీ సాయినాధార్పణమస్తు)