27.08.2013 మంగళవారము
ఓం సాయి శ్రీసాయి జయజయ సాయి
సాయి బంధువులకు బాబావారి శుభాశీస్సులు
16 రోజుల తరువాత మరలా మన బ్లాగులో ప్రచురణకు వీలు కుదిరింది..హైదరాబాదు ప్రయాణాలవల్ల, కొన్ని వ్యక్తిగత పనులవల్ల, ఆలశ్యం జరిగింది..ఈ ఆలశ్యానికి బాబావారిని మన్నించమని వేడుకొంటు ఈ రోజు సాయితో మధురక్షణాలలోని ఒక మధురక్షణాన్ని మీకందిస్తున్నాను. ముందుగా శ్రీవిష్ణుసహస్రనామం 83వ.శ్లోక, తాత్పర్యం.
శ్రీవిష్ణుసహస్రనామం 83వ.శ్లోకం:
శ్లోకం: సమావర్తో నివృత్తాత్మా దుర్జయో దురతిక్రమః |
దుర్లభో దుర్గమో దుర్గో దురావాసో దురారిహా ||
తాత్పర్యం: పరమాత్మను తిరిగి వచ్చుచున్న మరియూ తిరిగిరాని ఆత్మలతో కూడిన సృష్టి చక్రముగా, ధ్యానము చేయుము ఆయనను జయించుట, ఆయన ధర్మము నతిక్రమించుట మరియూ ఆయనను పొందుట మిక్కిలి కష్టము. ఆయనను సమీపించుట దుష్కరము. మాయతో కూడిన నివాసమే ఆయనది. ఆయన భక్తులకు కోటవంటివాడు. దుష్టులను జయంచి సం హరించువాడు.
సాయితో మధురక్షణాలు - 16
(ఈ కలియుగంలో బాబా శక్తి అంతుతెలియనిది)
ఈ కలియుగంలో బాబా శక్తి అంతుతెలియనిది
మానవుని యొక్క వ్యక్తిత్వాన్ని విశ్లేషించడానికి వీలుకానంతగా క్లిష్టమయినది. అటువంటిది బాబాయొక్క వ్యక్తిత్వాన్ని విశ్లేషించడమంటే అది అత్యంత క్లిష్టమయినది. భయంకరమయిన పర్షియా ఎడారులలో గులాబీల పరిమళాన్ని ఎవరు పరిశీలించగలరు..చేతికందే దూరంలోనే ఉండి, ఉన్నట్లుండి దూరమయిపోయే ఎడారులలోని ఒయాసిస్సుల అందాన్నెవరు వర్ణించగలరు? అదేవిధంగా బాబా విషయంలో కూడా.
ఆయన ప్రేమను చాలా సులభంగా పొందవచ్చు. కాని అది శాస్త్ర నిరూపణకందనిది. భక్తుడు చేసే ఆధ్యాత్మిక అన్వేషణలో భక్తుడిని ఆ మార్గంలో కొంతవరకు తీసుకొని వెడుతుంది, కాని పూర్తిగా ఆదారిలోకి తీసుకొని వెళ్ళదు. బాబాను గూర్చి సరియైన అవగాహన రావాలంటే ప్రారంభంలో చేసే తత్వవిచారణ ఎంతో ఉపయోగకరంగా ఉంటుంది. బాబాను గురించి తెలుసుకోవడానికి ఆధ్యాత్మిక విచారణా కొంతవరకు ఉపయోగమే. కాని, విచారణ ఎప్పుడయితే పూర్తవుతుందో అప్పుడే నిజ తత్వం బోధపడుతుంది. చిన్న పిల్లవాడు తనకు కావలసినది లభించే దాకా ఏడుస్తూనే ఉంటాడు. అది లభించగానే ఏడుపు మానేస్తాడు. అదే విధంగా నిజమయిన భక్తుడు తగు విచారణ చేస్తూ, అనేక వివరాలను అడుగుతూ, వేడుకొంటూ చీకటిలో గ్రుడ్డిగా వెదకుతూ ఉంటాడు. ఎక్కడయితే పరిశోధన అంతమవుతుందో వెలుతురు ఉదయిస్తుంది.
పరిశోధనా మార్గంకన్నా సులభతరమైనది ప్రేమ మార్గం. యిలా శోధిస్తూ వెడదామనుకునే మార్గమంతా ముళ్ళతో నిండివుండి దానికి అనుగ్రహింపబడిన మేధావులు మాత్రమే ఆమార్గంలో పయనించగలరు. ఆ మార్గమే సంస్కారమనే మార్గం. అది చాలా కఠినతరమయినది. ఆమా ర్గంలో పయనించడం అందరికీ సాధ్యం కాదు. అందరికీ సులభమయిన మార్గం ప్రేమ మార్గం. భక్తుడు చేయవలసినది మవునంగా ఉండటమే. మిగిలినది బాబాయే చూసుకుంటారు. భక్తుడయినవాడు తాను ఏది నేర్చుకున్నా, ఏదీ తెలియనట్లుగానె ఉండి, బాబా అనుగ్రహం కోసం ఆయన దృష్టిలో ఒక చిన్నపిల్లవాడిలా మారిపోవాలి.
తన భక్తుని జీవితంలో జరగబోయే ఉపద్రవాన్ని బాబా వెంటనే జోక్యం చేసుకొని అడ్డుకొన్నారు. అది 1943వ.సంవత్సరములో మొదటి నెలలో మొదటి వారం. రచయిత యొక్క సోదరికి నెలలు నిండుతున్నాయి. యింతకు ముందే ఆమెకు యిద్దరు పిల్లలున్నారు. వారు పసి వయసులోనే మరణించారు. ఆమెకు ఏడవనెల. అందరికీ ఆమె ఆరోగ్యం గురించి ఆందోళనగా వుంది. కాని, రచయితకు ఆమె ఆరోగ్యం గురించి ఎటువంటి బెంగా లేదు. అంతా బాబా చేతులలోనే వుందని ఎంతో నమ్మకంతో నిబ్బరంగా ఉన్నారు.
రచయిత రోజు మాదిరిగానే పూజ చేసుకుంటున్న సమయంలో ఆయన సోదరి ఏడుస్తూ వచ్చి లేడీ డాక్టర్ ను పిలవమని చెప్పింది. తనకు అబార్షన్ అవచ్చనే భయాన్ని వెలిబుచ్చింది. ఆసమయంలో రచయిత యొక్క భావాలని ఒక్కసారి ఊహించుకోండి. బాబా మీద ఎంతో నమ్మకాన్ని పెట్టుకున్న తన నమ్మకానికి విఘాతం ఏర్పడబడబోతోందా? రచయిత నమ్మకానికి ఈ పరిణామం ఒక దిగ్భ్రాంతి.
యిటువంటి సంక్షోభసమయంలో బాబా తన భక్తుని శిక్షిస్తున్నాడా? జాం నేర్ లో నానా కుమార్తె ప్రసవ వేదన పడుతున్న సమయంలో ఆమెకు సుఖప్రసవమవడానికి బాబా సహాయం చేయలేదా? ప్రధాన్ బిడ్డ చావు బతుకులలో ఉన్నపుడు అతనిని బాబా వెన్వెంటనే రక్షించలేదా? బాబాయే దైవికమైన వైద్యుడు. అటువంటిది ఆయనే చేయలేనపుడు ఒక లేడీ డాక్టరు చేయగలదా? కాదు, అలా జరగడానికి వీలులేదు. ఇక్కడ చావా, పుట్టుకా, బాబా తేల్చవలసిన సమస్య.
యిక విచక్షణా జ్ఞానం కోల్పోయి కోపోద్రేకంతో రచయిత బాబా విగ్రహంలో కొంత భాగాన్ని పగులగొట్టి, పొడి చేసి ముద్దగా తయారుచేసి దానిని తన సోదరి పొట్టమీద రాశాడు. భగవంతుని నిర్ణయమేమిటో తెలియక, విచక్షణా జ్ఞానం కోల్పోయి కోపంతో ఒక అంధ భక్తుడు చేసిన చర్య యిది. మందే విచిత్రమనుకుంటే నివారణ కుడా చాలా విచిత్రమైన విషయం. ఒక్క క్షణంలోనే ఆమెకు జరగబోయే గర్భస్రావం ఆగిపోయి, ఆమె కోలుకొంది. ప్రమాదకరంగా రజగబోయే అబార్షన్ అదృశ్య శక్తితో నివారణయింది. అది బాబా విగ్రహం పగులగొట్టి దాని పొడిని ముద్ద్గచేసి రాయడం వల్లనా? లేక రచయిత కోపోద్రేకంతో బాబా మీద దుడ్డుకఱ్ఱతో బాదినట్లుగా చేసిన చర్యా? రచయిత యిటువంటి సున్నితమయినప్రశ్నలకు కలత చెందలేదు.
సాయిసుధ 1943
రామనాధన్
కరూర్
(సర్వం శ్రీసాయినాధార్పణమస్తు)
0 comments:
Post a Comment