శ్రీసాయి పుష్పగిరి - ఆధ్యాత్మికం - 5వ.భాగం

        

         

13.03.2016 ఆదివారం

ఓం సాయి శ్రీసాయి జయజయ సాయి

సాయి బంధువులకు బాబావారి శుభాశీస్సులు

ఈ రోజు సాయి బానిస గారికి బాబా వారు ఆధ్యాత్మికతపై ఇచ్చిన సందేశాలను చదవండి.

          

శ్రీసాయి పుష్పగిరి - ఆధ్యాత్మికం - 5వ.భాగం

11.02.2006

41.  అన్నం పరబ్రహ్మస్వరూపం.  ఆకలితో ఉన్నవారికి ప్రేమతో అన్నంపెట్టు.  అతని ఆకలి తీరేవరకు అతనికి అన్నం పెట్టు.  ఆ సమయంలో అతనిని భగవత్ స్వరూపంగా భావించి అన్నం పెట్టు.  నీవు ఎవరికయినా అన్నం పెట్టినపుడు వారిని అర్ధాకలితో బయటకు పంపవద్దు.  అర్ధాకలితో పంపడం మహా పాపమని గ్రహించు. 

         

42.  శ్రీసాయి మనకు గురువు, దైవం.  మనము ఆయనకు భక్తులం మాత్రమే.  శ్రీసాయికి శిష్యులెవరూ లేరు.  మనం శ్రధ్ధ సాబూరీతో ఆయన నామస్మరణ చేస్తు మన సంసార సాగరాన్ని దాటాలి.                

                                                                                                                                                                           సాయిబానిస   

14.05.2006

43.  ఒక రాజుగారి దర్బారులో, రాజుగారు ప్రజలకు మంచి సూక్తులు చెబుతున్నారు.  ఆసమయంలో నేనక్కడికి వెళ్ళి రాజుగారిని ఒక ప్రశ్న వేశాను.  రాజా! నీకు గురుదర్శనం లభ్యమవుతున్న సమయంలో ఒక అనాధప్రేత సంస్కారానికి సంబంధించిన శవము కనిపిస్తే, గురుదర్శనం ముందు చేసుకుంటావా లేక అనాధప్రేత సంస్కారం చేస్తావా అని అడిగాను.  నామాటలకు ఆ రాజు ముందుగా అనాధ ప్రేత సంస్కారం చేసిన తరువాతే నేను గురుదర్శనానికి వెడతాను అని అన్నాడు.  ఈసమాధానం నాకు తృప్తినిచ్చింది.

(గురుసేవకంటె అనాధప్రేత సంస్కారము గొప్పది) 

11.08.2006

44.  జన్మించడం ఎంత సత్యమో మరణించడం కూడా అంత సత్యమే.  అందుచేత జనన మరణాల గురించి ఆలోచించకుండా వీటిని ప్రసాదిస్తున్నటువంటి ఆ భగవంతుని గురించి ప్రశాంతంగా ఆలోచిస్తూ జీవితాన్ని కొనసాగించు.

                         

11.08.2000

45.  ఈమధ్యకాలంలో యోగా కేంద్రాలలో చేరడం ఒకగొప్ప లక్షణంగా భావించబడుతోంది.  వీటి వలన ఆరోగ్యం సంపాదించవచ్చు.  కాని, ఆధ్యాత్మికమును ఏమాత్రము సంపాదించలేము.  అందుచేత ఆధ్యాత్మిక సంపాదన కోసము ఏకాంతముగా భగవంతుని గురించి ఆలోచించు. 

46.  ఆధ్యాత్మిక నదిలో ప్రయాణం సాగిస్తున్న నావను ఒడ్డుకు చేర్చి దానిని ఒక నాలుగు చక్రాల వాహనముపై పెట్టి అడ్డదారిన సముద్రతీరానికి తీసుకొని వెళ్ళి, సముద్రంలో ఆ నావను వదలటం మూర్ఖత్వం కాదా. 

      ఆధ్యాత్మిక రంగములో మనం ఆఖరిశ్వాస వరకు ప్రయాణం సాగించవలసిందే.  భగవంతుని సన్నిధికి చేరడానికి అడ్డదారులు ఉండవు. 

02.11.2006

47.  అన్నిమతాల సారము ఒక్కటే.  అందరూ ఆఖరికి చేరవలసిన గమ్యము ఒక్కటే.  అందుచేత అన్యమతాలలో ఆసక్తిని కనపర్చవలసిన అవసరం లేదు.  నీవు నీస్వధర్మాన్ని పాటిస్తూ నీ గమ్యాన్ని చేరుకో.  

21.01.2007

48.  ఆధ్యాత్మిక విందు (అనగా సత్సంగాలు) ను అందరితో కలిసి చేయి.  కాని ఆధ్యాత్మిక ప్రయాణం నీవు ఒంటరిగానే చేయవలసి ఉంటుందని గుర్తుంచుకో.  

                       

28.03.2007

49.  మనిషియొక్క ఆయుష్షు పెంచడానికి గుండెకాయకు బ్యాటరీ (పేస్ మేకర్) పెట్టి ఆయుష్షును పెంచగలరు వైద్యులు.  ఆ బ్యాటరీ కూడా పనిచేయడం ఆగిపోయినపుడు మనిషి మరణించవలసిందే.  మరణించిన మనిషితో పాటు బ్యాటరీ కూడా చితి మంటలలో కాలి బూడిదవవలసిందే.

                                    

26.06.2007

50.  నేను మీకు రెండు కణుపుల చెఱకు గడను యిచ్చాను.  వాటి కణుపుల దగ్గర కోసి మీ పొలంలో నాటండి.  ఆ చెఱుకు పంట పండించి ఆ పంటనుండి వచ్చే చెఱకురసంతో నాభక్తుల దాహం తీర్చండి.

(తరువాతి సంచికలో మరికొన్ని సందేశాలు)

 (రేపటి సంచికలో  బాబా వారు పంపించిన నెయ్యి --  ఎదురు  చూడండి)

(సర్వం శ్రీసాయినాధార్పణమస్తు)