శిఖరాలు - లోయలలో శ్రీసాయి (రెండవభాగము) - 14

                                                 
28.08.2012  మంగళవారము


ఓం సాయి శ్రీసాయి జయజయసాయి
సాయి బంధువులకు బాబావారి శుభాశీస్సులు

శిఖరాలు - లోయలలో శ్రీసాయి (రెండవభాగము) - 14


131.  భగవంతుని అన్వేషణలో కావలసిన శక్తిని ప్రసాదించమని శ్రీసాయిని కోరుకో.  





శ్రీసాయి శక్తి నీలో ప్రవేశించగానే  భగవంతుడు అయస్కాంతములాగ నిన్ను అంటిపెట్టుకొనే యుంటాడు.

      - 24.09.94

131.  చెడుపని కొంచము చేసిన, ఎక్కువ చేసిన ఫలితము ఒక్కటే అని నీకు తెలిసిన తర్వాత ఆకొంచము పని కూడా చేయటము ఎందుకు? లేనిపోని తలనొప్పి కొనితెచ్చుకోవటము ఎందుకు.

      - 24.09.94

132.  నీపిల్లలు నీనుండి ఎంత దూరములో ఉన్నా నీవు వాళ్ళ మంచిచెడ్డలు ఆలోచించుతూ ఉంటావే - నీవు తల్లి తాబేలువి. నీపిల్లలు అవతలి ఒడ్డున యున్న పిల్లతాబేళ్ళు.    అదే విధంగా నేను తల్లి తాబేలుని.  నాభక్తులు పిల్ల తాబేళ్ళు. 

      - 26.09.94

133.  సత్ గురువు చూపిన ఆధ్యాత్మిక రంగపు మెట్లను నీవు ఒక్కడివే ఎక్కగలవు అని తెలిసికూడా మెట్లు ఎక్కుతున్న సమయములో నేను, నావాళ్ళు అని ఆలోచించటములో అర్ధము లేదు. 

      - 02.10.94

134.  నీముసలితనములో కుక్కపిల్లలను చేరదీసి ప్రేమించితే అవి నిన్ను వదలవు. 


నీవు చికాకుతో విదిలించుకొన్న రోజున అవి  చచ్చిపోతాయి.  అది మహాపాపము.  ముసలితనంలో ఆధ్యాత్మిక విషయాలు ఆలోచించాలి.  కుక్కపిల్లలను చేరదీయకూడదు. 

      - 02.10.94

135.  మనసు కోరికలపుట్ట.  ఆకోరికలకు ఆకాశము హద్దు.  మనసు అనే రాకెట్టులో కోరికలును తీసుకొని ఆకాశములోనికి వెళ్ళగలము.  ఆరాకెట్టులో శక్తి నశించిన తర్వాత తిరిగి అది భూమి మీద పడక తప్పదు అని గుర్తించగలగటమే మనసును అదుపులో పెట్టడము.  

      - 05.11.94

136.  భగవంతుడు మనుషుల యోగక్షేమాలు చూడటానికి ఈభూలోకంలోనికి తన ప్రతినిధులను పంపుతాడు.  వారే మానవుల మధ్య తిరుగుతున్న యోగులు.  

      - 20.12.94

137.  సంఘములో పవిత్ర జీవితము గడుపుతున్నవారి యింటి ముంగిట, ఆకాశమునుండి నెమళ్ళు భగవంతుని అనుగ్రహము అనే దీపాలను తీసుకొని వచ్చి వ్రాలుతాయి అని నేను గట్టిగా చెప్పగలను.   


      - 22.08.97

138.  భగవంతుని సేవ చేసుకోవటానికి ఈశరీరము చాలా అవసరము.  ఆశరీరాన్ని ఆరోగ్యముగా యుంచుకోవటానికి మితముగా ఆహారము తీసుకోవాలనేది ముఖ్యము. 

      - 25.08.97

139.  నీయింటిలో కష్టాలు వచ్చినపుడు నీవు నీవాళ్ళను వదలి పిరికివాడిలాగా పారిపోవటము మానవతా ధర్మము కాదు.  అటువంటి స్థితిని నీజీవితములో రానీయకు.  

      - 30.08.97

140.  అనాధలు, అవటివారు కష్టాలులో యున్నపుడు మానవతా ధర్మముగా నీవు వారిని ఆదుకోవాలి.  అటుల చేయనివాడు మానవుడు కాదు వాడు దానవుడు. 

      - 30.08.97

(యింకా ఉంది)
సర్వం శ్రీసాయినాధార్పణమస్తు