శ్రీసాయి పుష్పగిరి – ఆధ్యాత్మిక జీవితం – 9వ.భాగమ్

08.05.2016 ఆదివారమ్

ఓమ్ సాయి శ్రీసాయి జయజయ సాయి

సాయి బంధువులకు బాబావారి శుభాశీస్సులు

సాయి బానిస గారికి సాయిబాబా వారు ప్రసాదించిన మరికొన్ని ఆధ్యాత్మిక సందేశాలు

శ్రీసాయి పుష్పగిరి – ఆధ్యాత్మిక జీవితం – 9వ.భాగమ్

03.02.2007

81.  ఆకాశంలో ఎగిరే విమానమయినా ఆఖరికి నేలమీద దిగవలసిందే.  అలాగే ఎగురుతూ పోతూ ఉంటే అది నేల మీదకి కూలిపోతుంది.  మానవుడు కీర్తి కోసము ఎంతపైకి ఎగిరినా కిందకు రావలసిందే.  అందుచేత కీర్తి కోసం ప్రాకులాడకుండా భూమిపై ప్రశాంత జీవితం సాగించు.

06.03.2007

   82.  బలవంతముగా ఇష్టములేని పని చేయరాదు.  మరియు ఇతరుల చేత చేయించరాదు అనే జీవిత సత్యాన్ని గ్రహించాను.                                                                                         

                                                  ----- సాయిబానిస                                                                                                         

                                                                                                            

03.04.2007

83.   ఆ జామ చెట్టును చూడు.  దానికున్న అందమయిన పువ్వుని చూడు.  ఆ పువ్వునించి వచ్చిన పిందెను చూడు. ఆ పిందె కాయగా మారడం చూడు.  ఆ కాయ సువాసన గల పండుగా మారడం చూడు.  ఆఖరికి ఆ పండు నేలమీదకి రాలడం చూడు.  అదేవిధంగా నీవు మానవజీవితాన్ని చూడటం అలవాటు చేసుకో. 

   

14.04.2007

           

84.  జీవితంలో ఒక్కొక్కసారి మనం కోరుకున్నది మనం సాధించలేము.  కాని, భగవంతుడు దయామయుడు.  మనకేది మంచిదో దానినే మనకు ప్రసాదిస్తాడు.

11.05.2007

85.  జీవితంలో బీదవాడిని చూసి అసహ్యించుకోవద్దు.  ధనవంతుడిని చూసి పొగడవద్దు.   అలాగే బంధువులు, స్నేహితులను పొగడవద్దు, అసహ్యించుకోవద్దు.  నీ జీవితంలో ప్రతి సంఘటన ఒక అనుభవంగా భావించి జీవించడం అలవాటు చేసుకో.

22.05.2007

86.  జీవితంలో ఉండటానికి ఒక ఇల్లు ఉండాలి.  అది మన తాహతుకు మించి ఉండరాదు.  ప్రశాంత జీవితానికి తగిన చోట నీ దగ్గర ఉన్న ధనానికి సరిపడ స్థలము కొని నీ తాహతుకు తగినట్లుగా గృహం నిర్మించుకుని ప్రశాంతంగా జీవించు.  అప్పులకు, గొప్పలకు పోవద్దు.

                 

09.06.2007

87.  గతము, గతములోని జ్ఞాపకాలు నేడు పనికిరాని చెల్లని చిల్లర నాణాలు.  వాటిని పోగుచేసుకోవడంలో అర్ధమేముంది.

12.06.2000

88.  నిజమయిన స్నేహం నీనుండి బహుమానమును కోరదు.  నీ నుండి ప్రేమనే కోరుతుంది.  శ్రీసాయి నీకు నిజమయిన స్నేహితుడు.  నీ ప్రేమను ఆయనకు అర్పించు.

                                                                                                                                                                 ---  సాయిబానిస

29.07.2007

                      

89.  మీ పొరుగువారితో మంచిగా ఉంటూ వారికి మాట సహాయం చేస్తు నీవు సమాజంలో జీవించు.  అందరూ ఈ విధానాన్ని పాటిస్తే ఈ సమాజంలో అసూయాద్వేషాలు తొలగిపోయి అందరూ సుఖశాంతులతో జీవించుతారు.

21.08.2007

90.  నీలోని గొప్పతనం నీ మనసులోనే ఉండాలి.  అది మానవాళికి ఉపయోగపడాలి.  నీ వేష భాషలు నీ ప్రక్కవాడి వరకె పరిమితమవాలి.  నీలో దాగియున్న గొప్పతనం, మంచితనం నీ ఈ జన్మను సార్ధకం చేస్తుందని గ్రహించు.

(మరికొన్ని సందేశాలు తరువాతి సంచికలో)

(సర్వం శ్రీసాయినాధార్పణమస్తు)