పల్లకి ఉత్సవం

20.05.2011 శుక్రవారము


పల్లకి ఉత్సవం



ఓం సాయి శ్రీ సాయిజయజయ సాయి

సాయి బంధువులందరకు బాబా వారి ఆశీస్సులు

షిరిడీలో ప్రతీ గురువారం చావడి ఉత్సవం జరుగుతుందని మనకందరికి తెలుసు. అసలు ఆ చావడి ఉత్సవం యెప్పుడు యెలా ప్రారంభమయిందో ఈ రోజు తెలుసుకుందాము.


షిరిడీ లో ప్రతి గురువారం రాత్రి పల్లకి ఉత్సవం జరుగుతుంది. అది చూడడానికి కన్నుల పండుగగా ఉంటుంది. శ్రీ సాయి ద్వారకామాయి నుండి బయలుదేరి చావడి వరకు ఊరేగింపుగా భక్తులతో కలసి తప్పెటలు, తాళాలు, బాజాల మ్రోతల మధ్యన పల్లకి వెనుకగా చిందులు వేస్తూ ఈ పల్లకి ఉత్సవం లో పాల్గొనేవారు.
అసలీ ఉత్సవం ఎలా ప్రారంభమైందంటే, షిరిడీలో ఒకసారి భారీ వర్షాల వలన ద్వారకామాయి లోకి బాగా నీళ్ళు వరదలా వచ్చేసాయి. అంతా తడిసిపోయింది. బాబా నిద్రపోవడానికి ఏ మాత్రం పొడి జాగా లేదు. అప్పుడు భక్తులంతా బాబాను చావడికి తరలించారు. మరునాడు ఉదయం బాబా మామూలుగా ద్వారకామాయి తిరిగివచ్చారు. అప్పటినుండి బాబా రోజు విడిచి రోజు ద్వారకామాయిలోను, చావడిలోను నిద్రిస్తుండేవారు. ఇది డిశంబరు 10, 1909 లో జరిగింది. అంటే ప్రస్తుతానికి దాదాపు 101 ఏళ్ళముందు జరిగిందన్నమాట. ఆరోజు నుండి బాబా ద్వారకామాయి నుండి చావడికి వెళ్ళే ఊరేగింపుని "పల్లకి ఉత్సవం" లేదా "చావడి ఉత్సవం" గా అందరు సాయి భక్తులు ప్రతి గురువారం సంప్రదాయ బద్ధంగా చేయనారంభించారు. ఈ ఉత్సవంలో మేళతాళాల మధ్య మహాశివుని లా చిందులు వేస్తూ బాబా తరలివస్తారు. బాబా పాదుకలను పల్లకీలో ఉంచుతారు. బాబా కు బహూకరించిన గుర్రం "శ్యామకర్ణ" ను అలంకరించి తెచ్చేవారు. తాత్యా, మహల్సాపతి, బాబాకు చెరొక ప్రక్క నడవగా, తదితర భక్తులంతా కలసి పల్లకి ఉత్సవంలో పాల్గొనేవారు.

ఇప్పటికీ షిరిడీ లో ఈ ఆనవాయితీని కొనసాగిస్తున్నారు.


వాణీ జయరాం పాడిని ఈ హారతి పాట చూడండి. దీని లింక్ ఫేస్ బుక్ లొ కూడా ఉంచాను. మనసారా ఆలకించండి.

జయ షిరిడీశ జగన్నివాస మనసే హారతి

అందది కళ్ళు నీ మీదేరా హరిఓం హారతీ

పాలించే మరి పవళించేందుకు తారా హారతి ||జయ||

సాధు రూపం దాల్చిన సాయికి సద్గుణ హారతి

గురువారమున పుట్టిన సాయికి నిగ్రహమే హారతి

వెల్లువలయ్యే నీ వరములకు వందన హారతీ

చల్లని చూపుల సాయి నీకు చంద్రా హారతి ||జయ||

రామనవమిని జన్మించిన శ్రీరామా హారతి

ద్వారకమాయి మెట్టిన ఓ ఘన శ్యామా హారతి

పావన నామ పావన రూప నీకే హారతి

శివ తేజార్చిత గణపతి రూప వరదా హారతి ||జయ||

సకలము నీవే సర్వము నీవే, నేనే నీవయా

నీ లీలలను తెలియగ నేరము నీవే భారము

పంచభూతముల శాసించేటి శక్తే నీవయా

షిరిడీ క్షేత్రము దర్శన భాగ్యము కలుషాహరణము ||జయ||

శ్యామా, నానా, దాసగణుల దయతో కాచితివి

ఇహ పరమొసగే భక్తికి ముక్తిని వరమే ఇచ్చితివి

తల్లివి నీవే, తండ్రియు నీవే, గురువే నీవయా

సర్వ దేవతా నిలయము నీవే కొనుమా హారతి ||జయ||

దుప్పటి పైనా, దుప్పటి పరచి శయ్యే వున్నదీ

అరువది మించిన కళలకు నీవు దిక్కే అన్నది

వెన్నెల మనసుకంటే దైవం వేరేమున్నది

అమృతమూర్తి ఆరాధనలో ముక్తే వున్నది ||జయ||

అరిషడ్వర్గము అన్నిట మించిన మోహము మాయనిది

నానా కనులకు తెరలే కప్పుట దాల్చీ బ్రోచితివి

బ్రహ్మము కోరిన వ్యాపారికి మరి జ్ఞానము తెలిపితివి

లోభికి ఎన్నడు వశమే కానని ఇలలో చాటితివి ||జయ||

నిత్య సేవలు అందే నీకే తగునీ హారతీ

నవ మార్గముల భక్తిని తెలిపిన సాయి హారతి

దూషణ, భూషణ సమముగ నెంచే సాయీ హారతీ

సర్వ దేవతా సంగమ రూపా సాయీ హారతి ||జయ||

జయ షిరిడీశ జగన్నివాస మనసే హారతి

భక్తుల ఆశల రూపం నీవే సాయీ ఆరతి

అందరి కళ్ళు నీ మీదేరా హరిఓం హారతీ

పాలించే మరి పవళించేందుకు తారా హారతి ||జయ||