శ్రీ సాయి పుష్పగిరి - ఆధ్యాత్మికమ్ – 14వ.భాగమ్

06.04.2016 బుధవారమ్

ఓమ్ సాయి శ్రీసాయి జయజయ సాయి

సాయి బంధువులకు బాబావారి శుభాశీస్సులు

ఈ రోజు సాయిబానిస గారికి బాబావారు ప్రసాదించిన మరికొన్ని ఆధ్యాత్మిక సందేశాలు మన కోసం.

శ్రీ సాయి పుష్పగిరి -  ఆధ్యాత్మికమ్ – 14వ.భాగమ్

08.08.2012

131.  నీకు జన్మనిచ్చిన నీ తల్లిని నీ జన్మస్థలాన్ని ఎప్పటికీ మర్చిపోవద్దు.  నీ తల్లికి చేసే సేవ సాయికి సేవగాను, నీ జన్మస్థలమును షిరిడీగాను భావించి జీవించు. 

                                                                                                                                                                              సాయిబానిస

10.08.2012

                          

132.  కుటుంబంలో అందరూ భగవంతుని భక్తులయినా మంచిదే.  అలాగని పనిపాటలు మానివేసి, నిత్యము పూజలు, భజనలు చేస్తూ ఉంటే జీవనవిధానంలో అనేకమయిన తలనొప్పులు రాగలవు.  అందుచేత భగవతునిపై భక్తిని జీవితంలో ఒక భాగము మాత్రముగానే చూడు.  

19.08.2012

133.  ఆధ్యాత్మిక రంగంలో నీ స్వయం కృషిని (ఒక తపస్సులాగ) భగవంతుడు చూసి ఆయన సదా నీకు తోడుగా ఉండి నిన్ను నీ గమ్యానికి చేర్చుతాడు.  

20.08.2012

            

134.  అణుశక్తి సూక్ష్మమయిన అణువునుండి వస్తుంది.  అలాగే ఆధ్యాత్మిక శక్తి సూక్ష్మమయిన ఆత్మనుండి ఉద్భవిస్తుంది.

                                   

26.08.2012

                                      

135.  తల్లి కోడి తనపిల్లలకు ఆహారం తినడం నేర్పుతుంది.  తన పిల్లలను కాపాడుకుంటూ తన జీవనాన్ని కొనసాగిస్తుంది. తన పిల్లలపై దాడిచేయడానికి వచ్చే డేగతో కూడా దెబ్బలాడటానికి సిధ్ధపడుతుంది.  తల్లికోడి నిజమయిన మాతృమూర్తిగా జీవిస్తుంది.  అదే విధంగా సద్గురువు కూడా తన భక్తులను తల్లి కోడి లాగ కాపాడుతారు.   

                            

20.09.2012

136.  వానప్రస్థాశ్రమంలో దేవాలయాలకి, తీర్ధయాత్రలకి వెళ్లవలసిన అవసరము లేదు.  నీ దేహమే దేవాలయము.  భగవంతుడు నీగుండెలోనే ఉన్నాడని భావించి జీవించు. 

         

(శ్రీమతి పీ.సుశీల గానం చేసిన నా దేహమే నీదేవళం  పాట వినండి..యూ ట్యూబ్ లింక్ ఇస్తున్నాను)

https://www.youtube.com/watch?v=EVOIEiS6ch8

27.09.2012

137.  వినాయకచవితినాడు పూజ అనంతరము పాలవెల్లికి కట్టిన మొక్కజొన్నపొత్తులను వినాయకుని పేర నోరులేని జీవాలకి పెట్టడానికి ఎవరూ ముందుకు రావటల్లేదే అని బాధపడుతున్నాను.  వాటిని కాల్చుకుని తిని నోరులేని పశువులకు పశు గ్రాసమును లేకుండా చేస్తున్నారు. 

27.10.2012

138.   మనిషి అంతిమయాత్రలో ఆఖరిస్నానం చేయించి ఆ పార్ధివ శరీరాన్ని అగ్నికి ఆహుతి చేస్తారు.  అదే మనిషి ఆత్మ తిరిగి పునర్జన్మ ఎత్తినపుడు శిశువు బాహ్యప్రపంచములోనికి వచ్చిన వెంటనే మొదటిస్నానం చేయిస్తారు.  ఈ స్నానాలు శరీరానికి మాత్రమే కాని ఆత్మకు కాదు.  

29.10.2012

139.  నీ ఇంటి నిర్మాణము పూర్తయిన తరువాత ఈశాన్యంలో పూజా మందిరం నిర్మించాలి అని ఆలోచించేకన్నా జీవితానికి పనికివచ్చే ఈశావ్యాసోపనిషత్తు గురించి తెలుసుకో.

03.11.2012

                   

140.  ఉదయం వేళలో నన్ను దర్శించడానికి నా మందిరాలకు రానవసరం లేదు.  నీ  గ్రామంలోని పొలాల గట్ల మీద విహరిస్తూ ప్రకృతిలో నన్ను చూడు.

(మరికొన్ని సందేశాలు తరువాతి సంచికలో)

(సర్వం శ్రీసాయినాధార్పణమస్తు)