సాయి.బా.ని.స. డైరీ

25.12.2011 ఆదివారము

ఓం సాయి శ్రీ సాయి జయజయ సాయి

ఈ రోజు సాయి.బా.ని.స. డైరీ 1993 17 వ.భాగాన్ని చదువుకుందాము

సాయి.బా.ని.స. డైరీ - 1993

06.10.1993 నిన్న రాత్రి శ్రీ సాయికి నమస్కరించి ఈ ప్రాపంచిక విషయాలలో (లంచాలు తీసుకోవటము) తగులుకోకుండ యుండే మార్గము చూపించమని వేడుకొన్నాను. శ్రీ సాయి చూపించిన దృశ్యము నా కళ్ళు తెరిపించినది. అది మోండా మార్కెట్. అక్కడ చక్కని పండ్లు, ఆకుకూరలు, కూరగాయలు గంపలలో యున్నాయి.

ఆ గంపల ప్రక్కన ఎత్తైన గోడ యుంది. ఆ గోడమీద ఒక మేక నిలబడి యుంది. ఆ గోడమీద నుండి చూస్తున్న ఆ మేకకు ఆ పండ్లు, ఆకు కూరలు తినాలని అనిపించి గోడమీద నుండి దూకాలా వద్దా అనే ఆలోచనలో పడినది. అంత ఎత్తు నుండి దూకితే ఆమేక కాళ్ళు విరగడము ఖాయము. అందుచేత ఆ మేక దూకటము ప్రయత్నము మాని గోడ వెనుక భాగాన ఉన్న మెట్లు దిగి వెళ్ళిపోయినది. ఈ దృశ్యము తర్వాత ఓ అజ్ఞాత వ్యక్తి అంటారు మనిషి కోరికలు మేక వంటిది. లంచాలు అనేది మనకు అందని ఫలాలు - అటువంటి ఫలాలును ఆశించితే మనకాళ్ళు చేతులు విరగడము ఖాయము. లంచాలను ఆశించరాదు.

08.10.1993

నిన్నరాత్రి శ్రీ సాయికి నమస్కరించి ఆయన వయస్సు తెలియచేయమని వేడుకొన్నాను. శ్రీ సాయి అజ్ఞాత వ్యక్తి రూపములో దర్శనము యిచ్చి నా చేతికి మూడు దృశ్యాల ఫొటో (3 డీ) యిచ్చి వెళ్ళిపోయినారు. ఆ ఫొటోను ఒక ప్రక్కనుండి చూస్తే ఉగ్రనరసిం హమూర్తిగాను (నరుడు + సిం హము)

ముందునుండి చూస్తే భారతములోని భీష్మ పితామహుడుగాను, యింకొక ప్రక్కన నుండి చూస్తే సినీనటుడు బాల కృష్ణగాను కనిపించినారు. ఆ ఫొటో చూసిన తర్వాత శ్రీ సాయి వయస్సు లక్షలు సంవత్సరాలు యుంటుంది అని నమ్మినాను.

11.10.1993

నిన్నటిరోజున మనసు చాలా చికాకుగా ఉండి శ్రీ సాయికి నమస్కరించి 16.10.1993 నాడు నా యింట జరగబోయే శుభకార్యము చేయగలనా లేదా లేకపోతే మాని వేయటము మంచిదా తెలియచేయమని వేడుకొన్నాను. శ్రీ సాయి చూపిన దృశ్యము చాలా ధైర్యాన్ని కలిగించినది. అది సర్కసుకంపెనీ. నేను ఆ కంపెనీలో ఉయ్యాలమీద ఫీట్స్ చేసే పనిలో చేరినాను. ప్రేక్షకులు అందరు వచ్చినారు.

ఆట ప్రారంభము అయినది. గంట మ్రోగినది. నేను త్రాడు, నిచ్చెన ఎక్కి ఉయ్యాల మీద కూర్చున్నాను. క్రిందకు చూసినాను. సాధారణముగా యుండవలసిన వల ఆరోజున లేదు. ఉయ్యాల మీద ఫీట్స్ చేస్తూ క్రిందపడితే చావడము ఖాయము. ఒళ్ళు అంతా చమటలు పట్టివేసినది. ఉయ్యాలనుండి దిగిపోవాలని అనిపించినది. కాని క్రిందనుండి సర్కసు మేనేజరు దిగటానికి వీలులేదు. నీవు ఉయ్యాల ఊగవలసినదే అన్నారు. ఫీట్స్ చేస్తున్నపుడు పడితే రక్షించే వల లేదు. నేను ఫీట్స్ చేయలేను అన్నాను. "భయపడకు - నీవు క్రింద పడకుండ నేను నిన్ను పట్టుకొంటాను. ధైర్యముగా ఉయ్యాల మీద ఫీట్స్ చేయి" అని ధైర్యము చెప్పి నాచేత ఉయ్యాల మీద ఫీట్స్ చేయించినారు. ఆమానేజరు (శ్రీ సాయి). ఈ విధముగా 16.10.1993 నాడు జరిగే శుభకార్యానికి ధైర్యము చెప్పినారు శ్రీ సాయి.

14.10.1993

నిన్న రాత్రి శ్రీ సాయికి నమస్కరించి సాయినాధ 16.10.1993 నాడు నా యింట జరగబోయే శుభకార్యము (బారసాల) వచ్చి నా మనవడిని ఆశీర్వదించి, భోజనము చేసి వెళ్ళమని కోరినాను. కలలో శ్రీ సాయి నా పినతల్లి భర్త శ్రీ ఉపాధ్యాయుల పేరేశ్వర సోమయాజులు గారి రూపములో నా యింటికి వచ్చినారు. నేను ఆయనను భోజనము చేయమని కోరినాను. ఆయన సంతోషముగా అంగీకరించినారు. యింతలో ఆయన తమ్ముడు శ్రీ నరసిం హమూర్తి చనిపోయినట్లుగా వార్త వచ్చినది. నేను ఆయనను వెంటనే కాకినాడ వెళ్ళమని చెప్పినాను. ఆయన అలాగ కాదు "నేను నీయింట భోజనము చేసి వెళతాను. నేను మాట తప్పను" అన్నారు. ఉదయము తెలివి వచ్చినది. శ్రీ సాయి, సోమయాజులుగారి రూపములో నాయింటికి భోజనానికి రాలేరు. ఆయన 1992 లో స్వర్గస్తులైనారు. శ్రీ నరసిం హమూర్తిగారు 1989 లో స్వర్గస్తులైనారు. మరి శ్రీ సాయి తన మాటను ఏవిధముగా నిలబెట్టుకొంటారు వేచి చూడాలి.

(ఇంకా ఉంది) మరలా గురువారము

సర్వం శ్రీ సాయినాధార్పణమస్తు

సాయి.బా.ని.స. డైరీ

24.12.2011 శనివారము

ఓం సాయి శ్రీ సాయి జయజయ సాయి

సాయి బంధువులకు బాబావారి శుభాసీస్సులు

ఈ రోజు సాయి.బా.ని.స.డైరీ 1993 16 వ.భాగాన్ని చదువుకుందాము

సాయి.బా.ని.స. డైరీ - 1993

23.09.1993

నిన్న రాత్రి శ్రీ సాయికి నమస్కరించి హాస్య ధోరణిలో సందేశము ప్రసాదించమని వేడుకొన్నాను. శ్రీ సాయి చూపిన దృశ్యము ఆ దృశ్యానికి సందేశము. నేను నా ఆఫీసులో పెద్ద ఆఫీసరుని. నేను నిక్కరు రంగుల చొక్కాతో ఒక జోకరులాగ తయారు అయి ఆఫీసుకు వెళతాను. నేను ఆఫీసరుగా నా పదవికి ఉన్న అధికారాన్ని దుర్వినియోగము చేసి నా బంధువులకు ఉద్యోగములు వేయించుతాను. నా బంధువులు కూడా నాలాగే నిక్కరులు రంగుల చొక్కలు ధరించి ఆఫీసులో నవ్వులు పాలు అగుతారు. ఆఫీసులో మిగతావారు నన్ను నాబంధువులను చూసి నవ్వుతారు. ఆఫీసులో ఒక పెద్ద మనిషి (శ్రీ సాయి) అంటారు. అధికార దుర్వినియోగము చేస్తే నవ్వులపాలు అవక తప్పదు". నాకు తెలివి వచ్చినది.

25.09.1993

నిన్న రాత్రి నిద్రకు ముందు శ్రీ సాయికి నమస్కరించి జీవితములో తెలుసుకోవలసిన సందేశములు ప్రసాదించమని వేడుకొన్నాను. శ్రీ సాయి దృశ్యరూపములో యిచ్చిన సందేశాలు.

1) నీ జీవితము అనే పడవను తయారు చేసుకోవటానికి నీ బంధు మితృల సహాయము తీసుకోవచ్చును. ఆ విధముగా తయారు కాబడిన పడవను కాలము అనే నదిలో నడపటానికి గురువు యొక్క ఆశీర్వచనాలు తీసుకోవటము మర్చిపోవద్దు.

2) కుక్క పిల్లలను కనిన వెంటనే తన పిల్లలపై సమానమైన ప్రేమను పంచిపెడుతుంది. ఆ కుక్క తన పిల్లల భవిష్యత్ మరియు అదృష్ఠము గురించి ఆలోచించదు. కొన్ని పిల్లలు ధనవంతుల యింటిలో చేరి రాజ భోగాలు అనుభవించుతాయి. కొన్ని అనారోగ్యముతో రోడ్డు ప్రక్కనే పడియుంటాయి. మానవుల విషయమునకు వచ్చేసరికి తల్లి తండ్రులు తమ పిల్లలమీద పక్షపాత వైఖరి చూపించుతారు. నా విషయములో నేను నా భక్తులను అందరిమీద సమాన ప్రేమను పంచి, వారి యోగ్యత బట్టి వారి అవసరాలు తీర్చుతాను. - శ్రీ సాయి

27.09.1993

నిన్న రాత్రి నా జీవితము గురించి చాలా ఆలోచించినాను. శ్రీ సాయికి నమస్కరించి ప్రశాంత జీవితానికి మార్గము చూపించమని వేడుకొన్నాను. శ్రీ సాయి చక్కని దృశ్యము చూపించి కనువిప్పు కలిగించినారు. వాటి వివరాలు. టీ.వీ. లో బబూల్ గం టూత్ పేస్టు అడ్వర్టైజ్ మెంట్ (ప్రకటన) వస్తున్నది. ఒక చక్కటి కుటుంబము చిరునవ్వులతో జీవించుతున్నామని చెబుతారు. నిజానికి వారు అందరు ఒక కుటుంబము వారు కాదు.వారు అందరు కిరాయి నటులు. అలాగ ఈ జన్మలో మనకు తోడుగా యుండే భార్యా పిల్లలు ఋణానుబంధము (కిరాయి) ద్వారా వచ్చిన నటీనటులు అని గుర్తు ఉంచుకో.

28.09.1993

నిన్న రాత్రి శ్రీ సాయి నా మనసుకు ప్రశాంతత కలిగించే దృశ్యము చూపించినారు. అది ఒక విశాలమైన పాఠశాల (బడి). ఆ పాఠశాలకు తలుపులు, కిటికీలు లేవు. రహస్యము అనే మాట ఆ బడిలో వినిపంచదు. సర్వ వేళలలో ఆ బడి తెరచి యుంటుంది. అక్కడి విద్యార్ధులకు, విద్యార్థినిలకు వయసుతో సంబంధము లేదు. అందరు చిరునవ్వుతో ఆ బడిలో ఆధ్యాత్మిక రంగములో అధ్యయనము చేస్తున్నారు. గురువు కంటికి కనిపించరు. అయినా అందరి కళ్ళలో తృప్తి కనిపించుతుంది. ఈవిధమైన దృశ్యము ద్వారా శ్రీ సాయి యిచ్చిన సందేశము - "కాలము అనే బడిలో శ్రీ సాయి అనే గురువుగారి క్లాసులో చేరటానికి విద్యార్ధి, విద్యార్ధినులకు వయస్సు అనే నిబంధన లేదు. ఈ దృశ్యము తర్వాత శ్రీ సాయి అజ్ఞాత వ్యక్తి రూపములో యిచ్చిన సందేశాలు.

1) అవసరాలకు మించి ధనము సంపాదించిన అది నీ మానసిక ఆందోళనకు దారి తీస్తుంది. అక్రమ మార్గములో ధనము సంపాదించితే అది సంఘ వినాశనానికి దారి తీస్తుంది. అందుచేత మానసిక ఆందోళనకు గురి కాని విధముగాను, సంఘములో గౌరవానికి భంగము కాని విధముగాను డబ్బు సంపాదించటములో తప్పు లేదు.

2) ఓ మంచి వ్యక్తి చావు భోజనం - భగవంతుని ప్రసాదముకంటె గొప్పది అని గ్రహించు.

3) జీవితములో జననము - మరణము అనేవి జంట ప్రక్రియ అని భావించి సంతోషముగా జీవించినవాడు చాలా అదృష్ఠవంతుడు.

03.10.1993

నిన్న రాత్రి శ్రీ సాయికి నమస్కరించి జీవితములో ధైర్యముగా బ్రతకటానికి మార్గము చూపమని కోరినాను. శ్రీ సాయి చూపిన దృశ్యము కనువిప్పు కలిగించినది. మనము భోజనము చేస్తున్నపుడు ఒక్కొక్కసారి ఆ భోజనముతోపాటు చిన్న చిన్న రాళ్ళు వగైరాలు మన జీర్ణకోశములో చేరి అక్కడ అడ్డుకొని పోతాయి. అటువంటి రాళ్ళు మన శరీరములో ఉన్నాయి అని కత్తితో మన పొట్ట కోసుకోము కదా. మన శరీరము అటువంటి రాళ్ళపై ఓ దళసరి పాటి పొరను ఏర్పరుచుతుంది మరియు ఆహార జీర్ణ ప్రక్రియకు అడ్డులేకుండ చూసుకొంటుంది. అదే విధముగా మానవుని జీవితములో సుఖాలు అనే భోజనము చేస్తున్నపుదు చిన్న చిన్న కష్ఠాలు అనే రాళ్ళు మనలో చేరుతాయి. ఆ కష్ఠాలను మనలో దాచుకొని సంతోషముగా జీవించాలి.

(యింకా ఉంది)

సర్వం శ్రీ సాయినాధార్పణమస్తు