సాయి.బా.ని.స. అనుభవాలు - 24

                                                          

                                   

                                                  
                                           
                                                   
05.07.2012  గురువారము
ఓం సాయి శ్రీసాయి జయజయ సాయి
సాయి బంధువులకు బాబావారి శుభాశీస్సులు 


సాయి.బా.ని.స. అనుభవాలు - 24 

(సాయి.బా.ని.స.ఆత్రేయపురపు త్యాగరాజుకు చెప్పిన సాయి అనుభవాలు)


(కలలలో సాయిబానిస గారికి శ్రీసాయి ఒక ముస్లిం ఔలియాగా దర్శనమిచ్చి ప్రసాదించిన అనుభూతులు)






1. పాక్ (పవిత్రమైన) మిఠాయి భండార్ 


ఒకనాటి రాత్రి సాయి.బా.ని.స. తన స్వప్నంలో హైదరాబాదులోని పాతనగరం లో రాత్రి సమయంలో ఆకలి దప్పులతో ఒక పిచ్చివాడిలా తిరగసాగారు. ఆసమయంలో పాక్ (పాక్ అనగా పవిత్రమయిన - అని అర్ధము) మిఠాయి భండార్ వద్ద ఆకలితో తనకు ఏదయినా తినడానికి మిఠాయి పెట్టమని ఆదుకాణం యజమానిని అడిగినారు.



ఆ  ఔలియను పోలిన దుకాణుదారుడు సాయి.బా.ని .స.ను తన చెంతకు చేరదీసుకుని  త్రాగడానికి మంచినీరిచ్చి, కడుపునిండా తినడానికి  వేడి వేడి జిలేబీ లోపలినించి తెచ్చియిచ్చినారు. సాయి.బా.ని.స. ఆకలి తీరిన తరువాత ఆ ఔలియా పాదాలకు నమస్కరిస్తున్న సమయంలో ఆ ఔలియా గారు సాయి.బా.ని.స. కళ్ళలోకి చూసి, 





నీవు కళ్ళజబ్బుతో బాధపడుతున్నావు. నీకు నేను ఆజబ్బు ఈరాత్రికే నయం చేస్తాను, రేపు ఉదయం లేచి నీయింటికి వెళ్ళు అని రెండు తమలపాకులు తెచ్చి తననోటిలో తినుచున్న తాంబూలమును ఆరెండు ఆకులలోను వేసి కళ్ళకు కట్టుగా కట్టినారు.  ఈరాత్రికి ఇక్కడే విశ్రాంతి తీసుకో అని చేప్పారు.  మరుసటి ఉదయము ఆయన దుకాణము తెరచి సాయి.బా.ని.స.ను  నిద్రలేపినారు. సాయి.బా.ని.స కళ్ళకున్న కట్టువిప్పి రెండు కళ్ళలోను మంచి నీరు పోసినారు. ఆ రెండు కళ్ళను  శుభ్రము చేసిన తరువాత -  నీరెండు కళ్ళు ఎట్లా ఉన్నవని సాయి.బా.ని.స.ను అడిగినారు.   సాయి.బా.ని.స. తనరెండు కళ్ళల్లోను ఒక కన్ను స్పష్టముగా వెలుతురును చూడగలుగుతున్నదని, మరొక కన్ను మసకగా ఉన్నదని సమాధానమిచ్చినారు.   దానికి ఆ ఔలియాగారు నవ్వుతూ నీవు ఒక సాయి భక్తుడిగా నమ్మకంతో జీవించుచున్నావు కనక ఒక కన్న్నుతో  స్పష్ఠముగా వెలుతురుని చూడగలుగుతున్నావు.  నీలో యింకా - నేను బ్రాహ్మణ కులములో పుట్టినవాడిని అనే అహంకారము ఉన్నది కనుక రెండవ కంటిలో మసక తొలగలేదు.  నీలో బ్రాహ్మణుడు అనే కుల అహంకారము తొలగిన రోజున, నీరెండవ కన్ను కూడా స్పష్టముగా కనిపిస్తుంది అని చెప్పి సూర్యోదయము వేళ సాయి.బా.ని.స.ను తన యింటికి ఆ ఔలియాగారు పంపివేసినారు.  
                                                       ***********

రంజాన్ నెలలో సాయి.బా.ని.స. కు ఒకరోజు రాత్రి కలలో శ్రీ సాయి ఒక ముస్లిం ఔలియాగా దర్శనమిచ్చి సాయి.బా.ని.స.కు ఇచ్చిన అనుభూతిని మీకు వివరిస్తాను.


2. అల్లా - రామ్ 


సాయి.బా.ని.స.   రంజాన్ మాసములో సాయంత్రము ఉపవాస దీక్షను విరమించే సమయములో హైదరాబాదు అసెంబ్లీ పక్కన ఉన్న పబ్లిక్ గార్డెన్ లోని మసీదు ప్రాంగణము ముందు తిరగసాగారు. 





 ఆసమయములో ముస్లిం భక్తులు తమ ఉపవాస దీక్షను విరమించి ఖర్జూరపు పళ్ళు తినసాగారు.  సాయి.బా.ని.స.కు తనకు కూడా ఎవరయినా ఆఖర్జూరపు పళ్ళు ఇచ్చిన తినాలనే కోరిక కలిగింది.  ఆసమయములో షిరిడీసాయిని పోలిన ఒక  ఔలియాగారు మసీదునుండి బయటకు వచ్చి "గోపాల్ బేటా యహా ఆవో" అని పిలిచినారు. నీకు ఖర్జూరపు పళ్ళు తినాలని కోరిక వుందికదా! నేను నీకోరిక నెరవేరుస్తాను అని చెప్పి ఒక కాగితపు పొట్లంలో తినడానికి ఖర్జూరపు పళ్ళు మరియు అంజూర పళ్ళు, ఒక పింగాణీ పాత్రలో త్రాగడానికి ద్రాక్షరసము యిచ్చినారు.  సాయి.బా.ని.స.  ఆపళ్ళు తిని  ద్రాక్షరసము త్రాగిన తరువాత ఆ ఔలియాగారిని ఉద్దేశించి, తమ నామధేయమును తెలపమని కోరినారు. ఆ ఔలియాగారు తనపేరు "అల్లారామ్ "  అని   చెప్పినారు.  మీరు యింతమంది భక్తులకు విందు చేయుచున్నారు కదా, మీరు ఏమి వ్యాపారం చేసి యింత ధనం సంపాదించారు అనిసాయి.బా.ని.స. అడిగినారు.  దానికి ఆ ఔలియాగారు తాను హిందువులను, ముస్లింలను కలపడానికి సిమ్మెంటును తయారుచేసి ఆ సిమ్మెంటును అమ్మే సిమెంటు వ్యాపారినని చెప్పినారు. సాయి.బా.ని.స. ఆ ఔలియాగారి పాదాలకు నమస్కరించి తన యింటికి వెళ్ళిపోయినారు.      


సర్వం శ్రీసాయినాధార్పణమస్తు 

బాబా కరుణాహృదయం

                                            
02.07.2012  సోమవారము
ఓం సాయి శ్రీసాయి జయజయ సాయి
సాయి బంధువులకు గురుపూర్ణిమ శుభాకాంక్షలు 


బాబా కరుణాహృదయం





ఈ రోజు అమెరికా నుంచి ఒక అనామిక భక్తురాలు పంపిన బాబా లీలను తెలుసుకుందాము.





ఇది 22 సంవత్సరాల క్రితం జరిగిన సంఘటన 


మా మేనమామకు అబ్బాయి పుట్టినప్పుడు వాక్సినేషన్  ఇంజెక్షన్ యొక్క సూది తొడలోని ఎముకకు తగిలి ఇంఫెక్షన్ సోకింది. బాబు కాలు కూడా కదలచలేకపోయేవాడు. బాబుని డాక్టర్ గారికి చూపించాము. డాక్టర్ గారు పరీక్షించి చాలా చీము పట్టిందని చెప్పి తొడ భాగములో చిన్న ఆపరేషన్ చేసి  నడుము దగ్గిరనించి కాలిపాదం వరకు కట్టు కట్టారు. 2 - 3 నెలల వయసున్న ఆ బాబుని ఆ స్థితిలో చూడటం మాకు చాలా బాధగా ఉండేది. ఆసమయములో మేము గుంటూరులో వుండేవారము. మేము బాబుని చాలామంది ప్రముఖ ఎముకల వ్యాధులను నయంచేసే డాక్టర్స్ వద్దకు తీసుకుని వెళ్ళి చూపించాము.  అందరూ కూడా పరీక్షించి  బాబు నడవలేడని ఒకే మాట చెప్పారు. జీవితాంతమూ కఱ్ఱల సాయంతో కుంటుతూ నడవవలసినదేనని చెప్పారు. 10 నెలల వయసు ఉన్న బాబుని అటువంటి పరిస్తితిలో చూడవలసివచ్చినందుకు మా కుటుంబమంతా ఎంతో బాధ పడ్డాము. 


ఆసమయములో మా మేనమామ ఢిల్లీలో ఉద్యోగంచేస్తున్నారు.  ఆయన మనస్పూర్తిగా ఎంతో భక్తితో తన బాబుకు మంచి ఆరోగ్యాన్ని ప్రసాదించమని ప్రార్ధించారు. బాబుని ఢిల్లీలోని డాక్టర్ వద్దకు తీసుకునివెడుతూ కరోల్బాగ్ లో ఆగారు.  మా మేనమామ స్కూటర్ పార్క్ చేయడానికి వెళ్ళగా మా అత్తయ్య బాబుని ఎత్తుకుని కింద నుంచుని ఉంది. బాబుని మెత్తని తెల్లటి తువ్వాలులో చుట్టి పట్టుకుని ఉంది.  లోపల కాలుకి కట్టు ఉంది  .  చూడటానికి భయంకరంగా ఉంది. 


ఆసమయంలో ఒక ముసలివ్యక్తి అక్కడికి వారికి చాలా దగ్గిరగా వచ్చాడు. మా  అత్తయ్య మంత్రం వేసినట్టుగా అయిపోయి అతనిని వారించలేకపోయింది. ఆ ముసలి వ్యక్తి బాబుకు చుట్టిన తువ్వాలును విప్పి బాబు పాదం మీద ముద్దు పెట్టుకుని బాబు చాలా అందంగా ఉన్నాడు బాబా ఆశీర్వదిస్తారు  అని వెళ్ళిపోయాడు.  మా అత్తయ్య అప్పుడు స్పృహలోకి వచ్చింది. వచ్చిన ఆ ముసలి వ్యక్తి ఎవరు, అతను కాలికి కట్టుతో ఉన్న బాబుని ముద్దుపెట్టుకుంటుంటే ఎందుకని వారించలేకపోయాను అని ఆశ్చర్యపడింది. జరిగినదంతా మా మామయ్యకు చెప్పింది. 


తరువాత ఇద్దరూ డాక్టర్ వద్దకు  బాబుని తీసుకుని వెళ్ళారు. బాబుని పరీక్షించి డాక్టర్ గారు ఏమన్నారో తెలుసా?


"బాబుని ఆడుకునేవాడిని ఆడుకోనివ్వకుండా ఎందుకంత పెద్ద కట్టుకట్టి కష్ఠపెడుతున్నారు? బాబు చక్కగా ఆరోగ్యంగా ఉన్నాడు. కాలు లో ఎటువంటి సమస్యాలేదు. ఇన్ ఫెక్షన్ కూడా లేదు అని బాబుకు ఉన్న కట్టునివిప్పేశారు. బాబు తన రెండు కాళ్ళతోనూ చక్కగా ఆడుకుంటున్నాడు. 


ఆ వచ్చిన ముసలి వ్యక్తి బాబా తప్ప మరెవరూ కాదు.   


సర్వం శ్రీసాయినాధార్పణమస్తు