శ్రద్ధ - సబూరి

          

          

03.07.2015 శుక్రవారం

ఓంసాయి శ్రీసాయి జయజయ సాయి

సాయి బంధువులకు బాబావారి శుభాశీస్సులు 

శ్రద్ధ - సబూరి 

బాబా తనభక్తులను పిచ్చుక కాళ్ళకు దారం కట్టి లాగినట్లుగా తనవద్దకు రప్పించుకుంటానని చెప్పారు.  మొదట్లో సాయిపై నమ్మకం లేకపోయి ఉండవచ్చు.  బాబాకు తన భక్తులు ఎంత దూరంలో ఉన్నా సరే, ఏదో ఒక సంఘటన ద్వారా, వారి మనసులను ప్రభావితం చేసి తన భక్తులుగా మార్చుకుంటారు.  మనసులో కోరుకున్న కోరికలను కూడా వెంటనే తీర్చి మనకి ఆశ్చర్యాన్ని కలుగ చేస్తారు.  ఆ సమయంలో మనకి అది ఒక అధ్బుతమయిన సంఘటనగా కలకాలం గుర్తుండిపోతుంది.  ఆవిధంగానే బాబా వారు నాకు షిరిడీలో ఆయన దర్శనానికి వెడుతున్నపుడు మనసులో బాబాకి ప్రసాదం, కనీసం గులాబీలయినా తీసుకెళ్ళకుండ, ఉత్త చేతులతో వెడుతున్నమని తలచుని బాధపడినప్పుడు వెంటనే నా కోర్కెను తీర్చారు.   (నా మొట్టమొదటి అనుభూతి).  ఆవిధంగా బాబా క్రమక్రమంగా మనకు ధృఢమయిన భక్తి ని కలిగిస్తారు.  మనం ఇక వెనుకకు తిరిగి చూసుకోనక్కరలేదు.  ఈ రోజు సాయిప్రభ మాసపత్రిక డిసెంబరు, 1987 సంచికలోని ఒక అద్భుతమయిన బాబా లీల తెలుసుకుందాము.     

ఓం సాయిరాం    

ఆత్రేయపురపు త్యాగరాజు, నిజాంపేట్ (హైద్రాబాదు)

సెల్: 9440375411 tyagaraju.a@gmail.com 

ఒక నానుడి.

"ఉదారంగా ఉండు.  అప్పుడు ఇతరులలో ఇంకా చనిపోకుండా నిద్రాణస్థితిలో ఉన్న ఔదార్యం నీ ఔదార్యంతో కలవడానికి సిధ్ధంగా ఉంటుంది.  స్థూలంగా చెప్పాలంటే నీ ఔదార్యాన్ని నువ్వెప్పుడూ కోల్పోవద్దు.  నీవల్ల ఇతరులు కూడా ఉదారంగా తయారవుతారు."  

ఇతరులలో అంతర్గతంగా నిద్రాణ స్థితిలో ఉన్న కొద్దిపాటి విశ్వాసాన్ని గాని, నమ్మకాన్ని గాని  బలోపేతం చేయడానికి మనం సహాయం చేయగలిగినపుడు అందరం కలిసి 'సాయి - నమ్మకం' అనే శక్తివంతమయిన ప్రవాహాన్ని సృష్టించగలం.  మనం ఏదయినా విత్తనాన్ని నాటినపుడు అది బలంగా పెరిగి మొక్కవడానికి కావలసిన ఎఱువులను వేస్తాము.  అదే విధంగా సహనం, ఓర్పు, పట్టుదల వీటిని కనక మనం ఎల్లప్పుడూ శ్రధ్ధగా ఆచరణలో పెట్టినపుడు సాయి మీద నమ్మకాన్ని మనం మరింతగా వృధ్ధి చేసుకోవచ్చు.

జీవిత కాలాన్ని పెంచిన బాబా

             

             

29.06.2015 సోమవారం

ఓం సాయి శ్రీసాయి జయజయసాయి

సాయి బంధువులకు బాబావారి శుభాశీస్సులు

 జీవిత కాలాన్ని పెంచిన బాబా 

ఈ రోజు సాయిలీల మాసపత్రిక 2010 వ.సంవత్సరం మార్చ్ నెల లో ప్రచురింపబడిన బాబా లీల తెలుసుకుందాము. మానవ జీవితం ఎప్పుడయినా అంతమవలసిందే.  భగవత్కృప ఎంత ఉన్నాగాని మానవుడు నూరు సంవత్సరాలకు మించి జీవించలేడు.  ఏ కొద్దిమంది అదృష్టవంతులో  తప్ప.  కాని ఈ లీలలో బాబా తన భక్తురాలి ఆయుష్షుని పెంచారు.  ఎందుకని పెంచారో ఈ లీల చదివితే మనకి అర్ధమవుతుంది.  ఇక చదవండి. 

1994వ.సంవత్సరంలో మా అమ్మగారికి గర్భాశయంలో కాన్సర్ ఉందని వైద్య పరీక్షలో నిర్ధారణ అయింది.  1998 నవంబరులో కాన్సర్ బాగా ముదిరిపోయింది.  ఆవిడ పరిస్థితి రోజు రోజుకీ క్షీణిస్తూ ఉండటంతో విశాఖపట్నంలో ఆమెకు వైద్యం చేస్తున్న వైద్యులు వెల్లూర్ కి తీసుకొని వెళ్ళమన్నారు. 

మానాన్నగారు, మా మేనమామ మా అమ్మగార్ని వెల్లూర్ కి తీసుకొని వెళ్ళారు.  అక్కడి వైద్యులు పరీక్షించి కాన్సర్ బాగా ముదిరిపోయిందని చెప్పారు.  మా అమ్మగారు ఏమీ తినలేని, త్రాగలేని పరిస్థితిలో ఉన్నారు.  ప్రేగుల కదలిక కూడా ఆగిపోయింది.  యిక ఆఖరిగా సర్జరీ ఒక్కటే చేయవలసి ఉంది.  ఎప్పుడయినా సర్జరీ చేసిన తరువాత బ్రతికే అవకాశాలు కూడా చాలా తక్కువని వైద్యులు మా నాన్నగారితో చెప్పారు.  సర్జరీ తప్ప వేరే మార్గం లేదు కనక మా నాన్నగారు సర్జరీకి అంగీకరిస్తున్నట్లుగా అవసరమైన కాగితాలన్నిటి మీదా సంతకాలు చేశారు.  ఆసమయంలో నేను చికాగోలో ఉన్నాను.  మా అమ్మగారి ఆరోగ్యం రోజురోజుకీ క్షీణిస్తూ ఉండటంతో మా నాన్నగారు నన్ను వెంటనే భారతదేశానికి వచ్చేయమని చెప్పారు.    

ఆరోజు నేను నా కాబోయే భార్యకి (ఆమెకి సాయి అంటే ఎంతో భక్తి) మా అమ్మగారి పరిస్థితి గురించి చెప్పాను.  ఆప్పట్లో నా కాబోయే భార్య భారతదేశంలోనే ఉంది.  ఆమె ఏమీ జరగదని ధైర్యం చెప్పింది.  మా అమ్మగారి ఆరోగ్యం కోసం బాబాని ప్రార్ధిస్తాననీ, నన్ను కూడా బాబాని ప్రార్ధించమనీ చెప్పింది.

మా అమ్మని కాపాడమని మొదటిసారిగా నేను కన్నీళ్ళతో బాబాని ప్రార్ధించాను.  బాబా వెంటనే నా మొఱ ఆలకించారు.  మా అమ్మగారు ఆపరేషన్  థియేటర్ లో ఉండగా అద్భుతం జరిగింది.  అప్పుడే ఆమెకి ప్రేగులలో కదలిక కలిగింది.  వైద్యులు ఆశ్చర్యపోయారు.  వారు బయటకు వచ్చి, ప్రేగులలో కదలిక వచ్చింది కాబట్టి ఆపరేషన్ అవసరం లేదని చెప్పారు.  తిరిగి విశాఖపట్నం తీసుకొనివెళ్ళి అక్కడే వైద్యం చేయించమని చెప్పారు. 

             

ఈసంఘటన జరిగిన నెలరోజులలోనే నా వివాహం జరిపించడానికి బాబా మా అమ్మగారికి తగిన శక్తిని ప్రసాదించారు.  బాబా ఆశీర్వాద బలంతో, అనుకున్న ముహూర్తానికి నా వివాహం జరిగింది.  బాబా ఆశీర్వాదంతో మా అమ్మగారు 15 నెలలు జీవించి జనవరి 2000 సంవత్సరం 23వ.తేదీన పరమపదించారు. 

విశాఖపట్నంలో మా అమ్మగారికి వైద్యం చేస్తూ వచ్చిన వైధ్యుడు కూడా సాయి భక్తుడే.  ఆవిడ ఆస్పత్రిలో ఉండగా, పారాయణ చేసుకోవడానికి మా అమ్మగారికి శ్రీసాయి సత్ చరిత్రనిచ్చారు.  ఆఖరి క్షణం వరకు మా అమ్మగారు ఆస్పత్రిలో తన తలగడ క్రిందనే సత్ చరిత్రని ఉంచుకునేవారు. బాబా తన భక్తులను ప్రేమతో తన అక్కున చేర్చుకొని ప్రతి నిమిషం వారిని కాపాడుతూ ఉంటారు.  తన భక్తులమీద ఆయన ప్రేమ అనంతం.   

మన జీవితంలో ప్రతి క్షణం మనలని కాపాడుతూ మా అమ్మగారికి 15 నెలలు అదనంగా జీవితాన్ని ప్రసాదించిన బాబాకు కృతజ్ఞత తెలపడం అంటే,  ఆ 'కృతజ్ఞత'  చాలా అల్పమయిన మాట.  

ఆయన పాదాలపై నాశిరసునుంచి, నన్ను, నాకుటుంబాన్ని ఎల్లప్పుడూ కాపాడుతూ ఉండమని వినమ్రంగా వేడుకొంటున్నాను. 

వెంకట్, న్యూజెర్సీ, అమెరికా. 

(సర్వం శ్రీసాయినాధార్పణమస్తు)