శ్రీ సాయి పుష్పగిరి - ఆధ్యాత్మిక జీవితం – 14వ.భాగమ్

28.05.2016 శనివారమ్

ఓమ్ సాయి శ్రీసాయి జయజయ సాయి

సాయి బంధువులకు బాబావారి శుభాశీస్సులు

సాయిబానిస గారికి బాబావారు ప్రసాదించిన మరికొన్ని ఆధ్యాత్మిక సందేశాలు

   

శ్రీ సాయి పుష్పగిరి -  ఆధ్యాత్మిక జీవితం – 14వ.భాగమ్

 11.03.2009

131.  స్వార్ధముతో మ్రగ్గిపోతున్న రోజులివి.  తను బాగుండాలి కాని ఎదుటివాడు నాశనం కావాలని ఆలోచించే ప్రజల మధ్య జీవించటము కష్టము.  అయినా తెలివితేటలతో జీవించాలి కలియుగంలో.

          

15.05.2009

132.  నీవుచేసే ప్రతి పనిని ఏవరో ఒకరు గమనిస్తూ ఉంటారు అనే విషయం మర్చిపోవద్దు.  అందుకే మంచి పనులు చేసి మంచివాడిగా పేరు తెచ్చుకో. 

24.06.2009

133.  జీవితం ఒక రైలుబండి ప్రయాణంవంటిది.  డ్రైవరు మీద నమ్మకంతో మనం ప్రయాణం కొనసాగిస్తాము.  ఆ డ్రైవరు విధి నిర్వహణలో మనం కలగజేసుకోము.  అలాగే జీవిత ప్రయాణంలో గురువుపై నమ్మకముంచాలి.  ఆయన పనిలో మనము కలగజేసుకోరాదు.

24.06.2009

                   

134.  బీదరికము అనుభవిస్తున్నా తల్లి తన బిడ్డపై చూపే ప్రేమ గొప్పది.  బీదరికము శాశ్వతము కాదు.  ప్రేమ శాశ్వతము. అందుచేత అనారోగ్యంతో బాధ పడుతున్న  బీదవారికి నీవు ధన సహాయం చేసి వారిని ఆదుకో.

11.08.2009

135.  మనం మాట్లాడుకునే భాష ముఖ్యం కాదు.  భావము ముఖ్యము.  అందుచేత మనుషులు మాట్లాడే భాషకు ప్రాధాన్యత ఇవ్వకు.  వారు ఎప్పుడయినా మంచి భావంతో పలకరిస్తే వారి భాషలోని భావాన్నే గుర్తుపెట్టుకో.  ఆ భాషను మరచిపో.  

        

 136.  నీవు గతంలో నివసించిన ఇళ్ళు కాలగర్భంలో కలసిపోయాయి.  ఆ ఇళ్ల స్థలాలలో కొత్త ఇళ్ళు వచ్చాయి.  అటువంటప్పుడు గతంలో నీకు సంబంధం ఉన్న ఇళ్ళు, ఆ ఇళ్ళలో నివసించిన మనుషులు, వస్తువులపై మమకారం ఎందుకు?

12.08.2009

                

137.  నిత్యము భగవంతుని పూజా కార్యక్రమాలు చేసే చేతులకన్నా ఆకలితో ఉన్నవాడికి అన్నం పెట్టే చేతులు మిన్న.

25.08.2009

          

138.  వృధ్ధాప్యంలో భార్యాభర్తలు కలిసి ఉండాలి. ఇద్దరూ స్నేహితులలాగ మసలుకోవాలి.  ఎవరికీ ఇబ్బందులు కలిగించకుండా జీవితాన్ని కొనసాగించాలి.       

  

09.09.2009

139.  పర మతంలోనివారు కష్టాలలో ఉన్నపుడు మానవత్వం అనే మతాన్ని నీవు స్వీకరించి వారికి సహాయం చెయ్యి. 

16.09.2009

140.  ఎవరి సానుభూతి ఎవరికీ ఉపయోగపడదు.  జరగవలసినదంతా జరిగిన తరువాత తిరిగి నూతన జీవితాన్ని ప్రారంభించు.  ఆ తరవాతనే గత సంఘటనలను సులువుగా మర్చిపోగలము.  

(మరికొన్ని సందేశాలు ముందు ముందు)

(సర్వం శ్రీసాయినాధార్పణమస్తు)